Күрше Самарада коточкыч хәлләр: 2 яшьлек кызны күршесе урлап чыккан һәм көчләп үтергән
11 августта Самара өлкәсенең Чапаевск шәһәрендә исерек ир күрше йорттагы 2 яшьлек баланы рәхимсез рәвештә көчләп үтергән. Вәхши сабыйның кулларын, аякларын сындырган. Башында да бик тирән яра бар.
Кызның әнисе эштә була, бу вакытта баланы әбисе һәм туган абыйсы карап торган. Пенсионер хатын өй эшләренә бүленеп алган арада, күрше ире баланы йорт ишегалдыннан урлап чыккан. «Комсомольская правда – Самара» журналисты һәлак булган кызның туган апасы белән аралашкан.
Ксениянең (баланы әнисе, исемнәре үзгәртеп бирелә) 3 баласы бар. Ике олы кызы – беренче иреннән, ә кечкенә Мира икенче никахыннан була. Күп балалы әни күпләр өчен үрнәк була: балаларын үзе аякка бастырырга тырышкан көчле хатын, күп эшли, эчми, тәртипсез тормыш алып бармый. Чапаевск администрациясе аны үрнәк ана һәм гаилә булган өчен бүләкләгән дә. Элекке ирләре дә кызларына ярдәм итеп тора. Фаҗига булган көнне 14 яшьлек олы кызы әтисендә кунакта, 13 яшьлек уртанчы кызы дуслары белән була. Ә икенче никахтан туган төпчек кызын Ксения әбисенә илткән була.
Сабый ишегалдында уйнаганда аңа 31 яшьлек туган абыйсы һәм әбисе күз-колак булып торган. Кичен аларга күршеләре Сергей кунакка керә.
«Без аны күптән беләбез инде. Тыныч кеше. Гап-гади күрше инде. Кеше үтергән өчен утырып чыкканын беләбез, тик, аңа яла якканнар, дип әйтәләр. Ул күрше-тирәгә гел кунакка кереп йөрде, моңа бөтен кеше дә күнеккән иде инде. Ул фаҗига булган көнне әбигә кунакка кергән, әмма аракы исе сизгәч, әби аны куып чыгарган, янәсе, мондый хәлдә кем кунакта йөри инде?» – дип сөйләгән һәлак булган кызның туган апасы.
Мираның абыйсы эшләре буенча чыгып китәргә җыена һәм киткәнен әбисенә әйтә, ә Мира ишегалдында үзе генә кала. Абыйсы артыннан исерек күрше дә өеннән чыга. Кызның әбисе берничә минутка йорт эшләренә бүленеп ала һәм ишегалдында кинәт кенә бик тыныч булып калганын сизә.
Сергей
Әбисе һәм абыйсы кызны сәгатькә якын эзли. Күршеләре Сергей да аларга ярдәмгә килә. Берникадәр вакыттан соң Сергей илереп кычкыра башлый, бу тавышка кызның абыйсы йөгереп килә һәм ташландык йортта сеңлесенең канга баткан гәүдәсенә тап була.
«Тавышка абый йөгереп килгән һәм катып калган – Мира кан эчендә яткан була. Ул аны кулына күтәрә һәм әбинең йортына чаба. Ул баланың канга баткан гәүдәсен күтәреп һәм үксеп елап барган. «Ашыгыч ярдәм» көткән арада, сеңелкәшне караватка яткырып торганнар. Абый бу вакытта гел аның янында булган һәм елаган. Мира соңгы сулышын алганда аның бармагын кысып тота һәм сулышы өзелә», – дип күз яшьләре аша сөйли үлгән кызның апасы.
Бу ыгы-зыгыда туганнары әлеге хәл турында Ксениягә шундук хәбәр итми. Ул хастаханәгә генә килә, әмма табиблар аның төпчек кызын коткарып кала алмый. Сабыйның тәнендә исән җире булмый.
Мираның әтисе аерым яши, ул, бу хәл турында ишетүгә үк, Самарадан Чапаевскига килгән. Кызның туганнары бу кайгыдан әле дә айный алмый.
«Мираның әтисе дә, апаның беренче ире дә бик кайгыра. Алар үле кебек йөриләр, гел елыйлар. Әби бертуктаусыз үкси генә. Ксения булдыра алганча түзәргә тырыша, тик аңа бик авыр. Аңа һичшиксез психолог кирәк», – дип сөйләде кызның туган апасы.
Полиция хезмәткәрләре көчләүчене шундук диярлек тота. Элек хөкем ителгән 36 яшьлек Сергейга Чапаевск шәһәр судында чикләү чарасы билгеләячәкләр. Басма әңгәмәдәше сүзләренчә, Сергей психоневрология диспансерында учетта тора. Күршеләре сөйләгәнчә, ул эпилепсия белән авырый, тик элегрәк аның өянәкләрен беркемнең дә күргәне булмаган. Һәлак булган Мираның апасы фикеренчә, педофил җәзадан качарга мөмкин, тик тикшерүчеләр, Сергей хөкем карарыннан кача алмаячак һәм бу гамәле өчен җавап бирәчәк, дип ышандырган.