Bellingcat: უკრაინაში მოკლულია "ვაგნერის" მიერ დაქირავებული 3 "კრიმინალური ავტორიტეტი"
Bellingcat-ი სამი მათგანის შესახებ წერს - 55 წლის ანდრეი ბერეჟნიხზე, 55 წლის იგორ კუსკზე და 59 წლის სერგეი მაქსიმენკოზე.
ბერეჟნიხს, რომელმაც ქალაქ ბალაკოვოში ორგანიზებული კრიმინალური დაჯგუფება 90-იან წლებში შექმნა, 2013 წელს რუსეთის უზენაესმა სასამართლომ 25 წლით პატიმრობა მიუსაჯა მკვლელობებისა და სხვა დანაშაულისთვის. საჯარო წყაროებით გავრცელებული ცნობებით, ბერეჟნიხი, რომელიც „ვაგნერმა“ საპატიმროდან 2022 წლის ნოემბერში დაიქირავა, უკრაინაში დეკემბერში მოკლეს.
ქალაქ პენზაში 90-იან წლებში შექმნილი კრიმინალური დაჯგუფების მეთაური სერგეი მაქსიმენკო 25 წლიან სასჯელს იხდიდა მკვლელობების ორგანიზების, გამოძალვის და სხვა დანაშაულისთვის. მაქსიმენკოც „ვაგნერს“ 2022 წლის ნოემბერში შეუერთდა, დეკემბერში კი - მოკლეს.
უკრაინაში მოკლულია „ვაგნერის" მიერ 2022 წლის ივლისში დაქირავებული „კრიმინალური ავტორიტეტი“ იგორ კუსკიც, რომელმაც 90-იან წლებში, თათრეთში შექმნა კრიმინალური დაჯგუფება. 2015 წელს, სასამართლომ კუსკი დამნაშავედ ცნო მკვლელობაში და 23 წლით პატიმრობა მიუსაჯა.
უკრაინასთან საომრად პატიმრების დაქირავების პროცესში პირადად მონაწილეობდა "ვაგნერის" დამფუძნებელი, რუსეთის პრეზიდენტ პუტინთან დაახლოებული პეტერბურგელი ბიზნესმენი ევგენი პრიგოჟინი.
კრემლი კერძო სამხედრო კომპანია "ვაგნერს" უკრაინამდე იყენებდა სირიასა და აფრიკაში. "ვაგნერელები" ეჭვმიტანილი არიან ომის არაერთი დანაშაულის ჩადენაში.