Քարտեզների վերաբերյալ որևէ համաձայնություն Հայաստանի ու Ադրբեջանի միջև չկա. Փաշինյան
Քարտեզների վերաբերյալ այս պահի դրությամբ ՀՀ-ի ու Ադրբեջանի միջև որևէ համաձայնություն չկա։
Այս մասին կառավարության հետ հարցուպատասխանի ժամանակ ասաց վարչապետ Նիկոլ Փաշինյանը՝ պատասխանելով Գեղամ Մանուկյանի այն հարցին, թե որ քարտեզներով են Հայաստանն ու Ադրբեջանը որոշում՝ որն է ՀՀ-ինը, որը Ադրբեջանինը։
«Կա համաձայնություն, որ ՀՀ-ն և Ադրբեջանը ճանաչում են միմյանց տարածքային ամբողջականությունը Ալմա Աթայի հռչակագրի հիման վրա ու կա ըմբռնում, որ ՀՀ-ի ու Ադրբեջանի միջև պետք է տեղի ունենա սահմանազատման գործընթաց։ Դրա քաղաքական հիմքը ևս պետք է լինի Ալմա Աթայի հռչակագիրը։
Ես ոչ մի նոր բան չասացի, որովհետև իմ ասածը հրապարակվել է դեռևս 2022թ-ի հոկտեմբերի 6-ին քառակողմ հանդիպման արդյունքներով։ Ալմա Աթայի հռչակագրի հիման վրա սահմազատում իրականցնելը նշանակում է ոչ թե ՀՀ-ի ու Ադրբեջանի միջև նոր սահման ստեղծել, այլ նշանակում է, որ ԽՍՀՄ վերջին սահմանները վերաարտահայտել գետնի վրա։ Այն տրամաբանությունը, որով առաջնորդվում ենք, դա է»,- ասաց նա։
Շարունակելով հարցադրումը՝ «Հայաստան» խմբակցության պատգամավոր Գեղամ Մանուկյանն ասաց․
«Նորից եմ հարցնում, Ալմա Աթայի հռչակագրով խորհրդային վերջին քարտեզը ո՞րն է, որովհետև Հայաստանը ամիսներ շարունակ պնդում էր, որ դա 1974-78 թթ-ի քարտեզն է, Ադրբեջանն ասում էր՝ ո՛չ, ձևակերպենք ընդհանուր քարտեզներ։ Ի վերջո այդ սահամանազատում, սահմանագծում ասվածը թղթի, քարտեզի վրա է լինում, կա՞ կոնկրետ քարտեզ, թե ուղղակի Ադրբեջանը մի թղթի վրա գծել է քարտեզ ու ասել է այ այսպես պետք է գնամ»։
Արձագանքելով՝ Փաշինյանը պատասխանեց․
«Եթե քարտեզ եք ուզում, ես ցույց եմ տվել այդ քարտեզը ու կարող եմ էլի ցույց տալ»։