Դատարանը քննում է Գրիգորի Խաչատուրովի կալանքի հարցը
Բարձրաստիճան նախկին զինվորականի փաստաբան Հակոբ Ենոքյանի խոսքով, այս գործը կապված է Պաշտպանության նախկին նախարար, ընդդիմադիր պատգամավոր Սեյրան Օհանյանին առնչվող քրեական գործի դրվագներից մեկի հետ։ Դատարանն այսօր քննում է Խաչատուրովի կալանքի հարցը։
«Ըստ էության նույն գործն է, ուղղակի այդտեղ գործերը միացրել են իրար։ Մի քանի գործ է հարուցված, միացված իրար։ Մեղադրանքը, այո, փողերի լվացմանն է առնչվում, բայց կոնկրետ Ազգային ժողովում հնչած միջնորդության դեպքի հանգամանքների հետ որևէ առնչություն չունի։ Այսինքն՝ էնտեղ պաշտոնեական դիրքը օգտագործելով, չարաշահելով պատճառած վնասի մասին է խոսքը, ինչ-որ գույքեր օտարելու։ Էստեղ ըստ էության, ոնց որ էդ գույքերից մեկը ձեռք բերելը որակվել ա որպես փողերի լվացում»։
Ազգային անվտանգության ծառայությունը Պաշտպանության նախկին նախարար Օհանյանին մեղսագրում է պաշտոնավարման օրոք խոշոր չափերով գույքի հափշտակություն և վատնում։ Մասնավորապես, Պաշտպանության նախարարությունն ավելի քան 8 տարի ղեկավարած Օհանյանը նախարարության հողամասերը զորանոցով, կից այլ շինություններով վաճառել է մի քանի անգամ ցածր գնով։ Պետությանը պատճառվել է միլիարդների վնաս։
Երբ խորհրդարանը քննում էր Օհանյանին անձեռմխելիությունից զրկելու միջնորդությունը, գլխավոր դատախազը հայտարարել էր, որ ՊՆ-ին պատկանող շինություններից մեկը փաստացի վաճառվել է Գրիգորի Խաչատուրովին չորս միլիոն դրամով, իսկ նա բանկում գույքը գրավադրել է 18 միլիոնով։
Խաչատուրովի փաստաբանն այսօր պնդեց, թե Խաչատուրովը 18 միլիոն վարկ ստացել է մեկ այլ գույքի գրավադրմամբ, իսկ դատախազության նշած հողամասը լրացուցիչ գրավ է եղել. - «Վանաձոր քաղաքում Գրիգորի Խաչատուրովին պատկանող գույքը դրված է եղել գրավ, դրանով վարկային գիծ ա տրամադրված էղել 18 միլիոն դրամի։ Հետո էս գույքը, որպես լրացուցիչ գրավի միջոց, պահանջվել ա բանկի կողմից, եթե չեմ սխալվում, որպես լրացուցիչ միջոց ա տրամադրվել։ Էնպես չի, որ էս գույքը տվել են, որ էդ գրավը լինի»։
Խաչատուրովի պաշտպանն անհիմն է որակում մեղադրանքն ու ներկայացնում է սեփական տեսակետը. - «Ասենք, էդ գրավը չմուծվեր, փող վերցվեր, մնար էդ բանկին... տեսեք, անօտարի գույքը ոնց որ վերածվեց դրամական միջոցի։ Էդ կլիներ որոշակի փողերի լվացում։ Բայց էս պայմաններում, երբ որ գույքը հիմա գրավից ազատ ա, ձեռք բերողը սկզբնական, առաջնային ձեռք բերողն ա, չի օտարել, չի տվել ուրիշի, ոչ մի բան արել, էդտեղ փողերի լվացման մասին... խնդալու ա ուղղակի»։
ՀԱՊԿ նախկին գլխավոր քարտուղարի որդին գեներալ-մայորի կոչում Փաշինյանի իշխանության օրոք է ստացել՝ տավուշյան հայտնի ռազմական գործողություններից հետո։ Կրտսեր Խաչատուրովը նաև Մարտական խաչով է պարգևատրվել հենց վարչապետի կողմից։