Որպեսզի ընտրություններում հաղթի Նիկոլը, նրան պետք է հաղթաթուղթ տալ, որի վրա մեծ տառերով գրված լինի «խաղաղություն». Արթուր Խաչատրյան
Որպեսզի ընտրություններում հաղթի Նիկոլը, նրան պետք է հաղթաթուղթ տալ, որի վրա մեծ տառերով գրված լինի «խաղաղություն», ֆեյսբուքյան էջում գրել է ԱԺ «Հայաստան» խմբակցության անդամ Արթուր Խաչատրյանը․
«Ամփոփելով Փաշինյանի ասուլիսը.
Նիկոլն Իլհամին խոսք է տվել 2027 թվականին փոխել ՀՀ սահմանադրությունը և բացառել այն դրույթները, որոնց դեմ թուրքերն ու ադրբեջանցիները վայրահաչում էին տարիներ ի վեր: Ընտրություններ 26 թվականին են, եթե հեծանիվով արտահերթի չգնա: Ո՞վ գիտի ի՞նչ կլինի 1.5-2 տարուց: Որպեսզի հաղթի Նիկոլը, նրան պետք է հաղթաթուղթ տալ: Այդ հաղթաթուղթը հենց այն թղթի կտորը կարող է լինել, որի մասին այսօր խոսեց zoxovrti varacepete: Թուղթ, որի վերնագրում, մեծ տառերով գրված լինի «խաղաղություն»:
Իր համար կարևոր չէ, որ այդ թուղթը կապիտուլյացիայի վավերացումն է լինելու, կարևորը վերնագիրն է: Դրանով ինքը քարոզարշավ կսկսի ու կփորձի մարդկանց մոլորեցնել, թե «տեսե'ք, խաղաղություն եմ բերել»: (Պատահական չէ, որ մի քանի ամիս առաջ ԱԺ պաշտպանության հանձնաժողովը մի ֆելետոն էր գրել` փորձելով հերոսացնել «խաղաղություն բերող» Չեմբեռլենին): Կասի, թե խաղաղությունը փխրուն է, պետք է սիրել ու փայփայել, իսկ դա, իրենից լավ, ոչ ոք չի կարող անել, իսկ ռևանշիստերը կգան ու կռիվ կսկսեն: Առիթից էլ կօգտվի ու այդ ռևանշիստներին բանտերում կփակի:
Բայց դե Ալիևն էլ ախմախ չէ, նա էլ է դա հասկանում ու Նիկոլից նոր զիջումներ կպահանջի այդ թղթիկի համար: Նիկոլն այսօր վերահաստատեց, որ արցախցիների վերադարձի հարց չի բարձրացնելու: Նշեց, որ պատրաստ է սահմանին ինչ որ մասնավոր պահապանների բերել, քանի որ Ալիևը չի ցանկանում, որ հայ սահմանապահները ստուգեն Հայաստան մտնող ադրբեջանցիներին: Հետաքրքիր է, էլ ի՞նչ մնաց: Միթե՞ երկրի անվանափոխությունը»,- գրել է պատգամավորը։