“ჯორჯიან მანგანეზი” და გაფიცული მაღაროელები ერთობლივ განცხადებას ავრცელებენ

“ჯორჯიან მანგანეზი” და გაფიცული მაღაროელები ერთობლივ განცხადებას ავრცელებენ და იმ პუნქტებს ჩამოთვლიან, რომლებიც კომპანიამ უახლოესი ერთი წლის განმავლობაში უნდა შეასრულოს.


"27 მაისს ქ. ჭიათურის მერისა და საქართველოს მთავრობის წარმომადგენლების - ეკონომიკის, ჯანდაცვისა და განათლების მინისტრების მხარდაჭერით გამართულ შეხვედრაზე “ჯორჯიან მანგანეზმა” და გაფიცვაში მონაწილე თანამშრომლებმა მიაღწიეს პრინციპულ შეთანხმებას", - ნათქვამია განცხადებაში.


რაც შეეხება შეთანხმების შინაარსს, გადაწყდა, რომ:



“ჯორჯიან მანგანეზი” უზრუნველყოფს მოლაპარაკებების დროს გაცხადებული სტრუქტურული რეფორმების გატარებით, თანამშრომელთა ხელფასების გაზრდას ორ ეტაპად, ჯამურად არანაკლებ 35%-ით, კერძოდ არაუგვიანეს 2019 წლის 01 ივლისისა მოხდება ხელფასის მატება 25%-ით, ხოლო ერთი წლის შემდგომ არაუგვიანეს 2020 წლის 01 ივლისისა მოხდება შემდგომი 10%-იანი მატება, ხელფასის დღეს არსებულ საბაზისო მაჩვენებელზე.
“ჯორჯიან მანგანეზი” გააუმჯობესებს და განავითარებს შრომის, უსაფრთხოებისა და ჯანმრთელობის დაცვასთან დაკავშირებულ ეფექტურ და პრევენციულ ღონისძიებებს.
“ჯორჯიან მანგანეზი” დანერგავს კვების ინდივიდუალურად, თითოეული თანამშრომლისათვის დაფინანსების მოდელს, რაც გულისხმობს კვების თვითორგანიზებასა და თითოეული თანამშრომლისათვის თავისუფალი კვების რაციონის - თავისუფალი არჩევანის კომპანიის მხრიდან ფინანსურ მხარდაჭერას.
შეხვედრაზე მიღწეული შეთანხმების შესაბამისად, “ჯორჯიან მანგანეზი” აანაზღაურებს საგაფიცვო პერიოდს.
“ჯორჯიან მანგანეზი” განაგრძობს საწარმოო ინფრასტრუქტურის განახლებასა და მოდერნიზებას.
გაფიცვაში მონაწილე მოშიმშილე პირების გამოჯანმრთელების პერიოდს “ჯორჯიან მანგანეზი” განიხილავს ანაზღაურებად დროებით შრომისუუნარობად და უზრუნველყოფს მათ მხარდაჭერას.
“ჯორჯიან მანგანეზი” და თანამშრომლები წერილობით გააფორმებენ და დეტალურად აღწერენ შეთანხმებულ საკითხებს.
წინამდებარე განცხადებით წარმოდგენილი შეთანხმება ძალაშია და გააჩნია შესასრულებლად სავალდებულო ძალა.


ჭიათურაში მაღაროელთა გაფიცვა 27 მაისს, დღის ბოლოს შეწყდა. 


რამდენიმე ასეული მაღაროელი 11 დღის განმავლობაში იყო გაფიცული ხელფასის გაზრდის, ჯანდაცვის პირობების გაუმჯობესების და ჭიათურაში მადნის გადამტანი მძიმეწონიანი ავტომანქანების გადაადგილების აკრძალვის მოთხოვნებით.



27 მაისსვე თანამდებობა დატოვა ჭიათურის სამთო-გამამდიდრებელი კომბინატის დირექტორმა, აკაკი გურჯიძემ.


შეგახსენებთ, პირველ ეტაპზე, მაღაროელთა მოთხოვნა ხელფასების 30%-ით ზრდა და რეორგანიზაციის შემდეგ, დამატებით 20%-ით ზრდა იყო. "ჯორჯიან მანგანეზი" კი მაღაროელებს ხელფასების 15%-იან ზრდას სთავაზობდა.