“ჩვენ დღეს ბათუმში იმისთვის შევიკრიბეთ, რომ საქართველოს მოქალაქეებისთვის გვეჩვენებინა რამდენი ვართ, რა გვჭირდება, სად მივდივართ”

ყოველდღე, როდესაც თითოეული ჩვენგანი ვუყურებთ, იმას, რომ ბიძინა ივანიშვილის საპყრობილეშია ადამიანი, რომელმაც ამ ქალაქს, ქვეყანას ძალიან დიდი პროგრესი მოუტანა, რა თქმა უნდა, გული გვტკივა,“- ამის შესახებ „ნაციონალური მოძრაობის“ ქუთაისის მერობის კანდიდატმა, ხატია დეკანოიძემ ბათუმში მიმდინარე აქციაზე განაცხადა.

როგორც დეკანოიძე განმარტავს, მიხეილ სააკაშვილი ბიძინა ივანიშვილის საპყრობილეშია.

„ჩვენ დღეს იმისთვის შევიკრიბეთ, რომ საქართველოს მოქალაქეებისთვის გვეჩვენებინა, მათ შორის, ჩვენი ოპონენტებისთვის რამდენი ვართ, რა გვჭირდება, სად მივდივართ, რატომ გვჭირდება გამარჯვება და როგორი უნდა იყოს საქართველოს მომავალი.

გარდა იმისა, რომ თქვენ ყველას დიდი მოწიწებით გეფერებით, არ შემიძლია ჩემი სიტყვა არ დავიწყო მისალმებით და მოკითხვით, ჩემი მეგობრის, საქართველოს მესამე პრეზიდენტით, მიხეილ სააკაშვილით, რომელიც დღეს ციხეშია, ბიძინა ივანიშვილის საპყრობილეში!

ყოველდღე, როდესაც თითოეული ჩვენგანი ვუყურებთ იმას, რომ ბიძინა ივანიშვილის საპყრობილეშია ადამიანი, რომელმაც ამ ქალაქს, ქვეყანას ძალიან დიდი პროგრესი მოუტანა, რა თქმა უნდა, გული გვტკივა, გაუსაძლისია.

არ უნდა დაგვავიწყდეს ერთი რამ, რისთვის ჩამოვიდა, რისთვის უყვარს თავისი ქვეყანა და რისი მიღწევა სურს მიხეილ სააკაშვილს. ამიტომ მივესალმოთ ჩვენს მეგობარს, ერთ-ერთ გამორჩეულ ადამიანს, იმ ადამიანს, ვისაც ეს ქვეყანა ტკივილამდე უყვარს“, – აღნიშნავს დეკანოიძე.

მან არჩევნების მეორე ტურზე ისაუბრა და აღნიშნა, რომ 30 ოქტომბერს ოპოზიცია გაიმარჯვებს.

„ჩვენ ვაპირებთ, რომ დავამარცხოთ ეს ხელისუფლება. დავამარცხოთ არა ზიზღით, არა გაუსაძლისი აგრესიით, რასაც ჩვენი ოპონენტები გვთავაზობენ, არამედ დავამარცხოთ, იმიტომ რომ ამ ქვეყნის შეუქცევადი მომავალი დაიწყოს. ამ ქვეყანას ჰქონდეს მომავალი, ქვეყანა არ იყოს მხოლოდ ბიძინა ივანიშვილის უკანა ეზო, როგორც მას სურს“, – აღნიშნავს დეკანოიძე და განმარტავს, რომ „რაც არ უნდა გრძელი იყოს ღამე და წყვდიადი, აუცილებლად გათენდება და მის შემდეგ აუცილებლად დადგება ყველაზე უფრო ნათელი და მზიანი დღე“.