მსახიობი ჯინ ჰეკმენი ცოლთან ერთად სახლში გარდაცვლილი იპოვეს
შერიფის განცხადების თანახმად, 95 წლის მსახიობი და მისი 64 წლის ცოლი ოთხშაბათს, ადგილობრივი დროით დაახლოებით დღის 1:45 სთ-ზე იპოვეს.
პოლიციის განცხადებით, ამ ეტაპზე სიკვდილის ფაქტზე დანაშაულის კვალის ეჭვი არ არსებობს, თუმცა გარდაცვალების ზუსტი მიზეზი ჯერ დადგენილი არაა და გამოძიება გრძელდება.
ჰეკმენი - საზღვაო ქვეითთა ყოფილი წევრი, რომელსაც სახასიათო, ოდნავ გაბზარული ხმის ტემბრით იცნობდნენ - გადაღებულია 80-ზე მეტ ფილმში, ისევე როგორც სატელევიზიო ფილმებში. ადრეულ 1960-იან წლებში დაწყებული კარიერის განმავლობაში ის თამაშობდა თეატრის სცენაზეც.
ჰეკმენი "ოსკარზე" პირველად წარადგინეს 1967 წლის ფილმში, "ბონი და კლაიდი", განსახიერებული მთავარი პერსონაჟის, მძარცველი კლაიდ ბეროუს ძმის, როლისთვის.
საკუთრივ პრემია კი მას პირველად მოუტანა ნიუ-იორკელი პოლიციელის, პოპაი დოილის პერსონაჟმა რეჟისორ უილიამ ფრიდკინის დეტექტიურ ტრილერში "ფრანგული კავშირი". მეორე "ოსკარი" ჰეკმენს მიანიჭეს კლინტ ისტვუდის ვესტერნ "მიუტევებელში" განსახიერებული შერიფის როლისთვის.