Перизат Қайраттың элиталық пәтерлері, Mercedes көліктері мен бұйымдарына бұғат қойылды
Сот санкциясы бойынша, қоғамдық қайырымдылық қорының тең құрылтайшысы әрі жетекшісі Перизат Қайраттың жылжымайтын мүлкі мен бұйымдарына бұғат қойылды, - деп хабарлайды Tengrinews.kz тілшісі.
Соттың санкциясы бойынша, қылмыстық жолмен алынған қаражатқа сатып алынған Астанадағы "Akbulak Riviera", "Highvill Ishim Gold", "Көк Жайлау" (тұрақ орындарын қоса алғанда), "Sensata Plaza" ТК, сондай-ақ "Vela Village" коттедж қалашығындағы элиталық жылжымайтын мүлік, Mercedes-Benz S450, Mercedes-Benz EQE 500, Lexus LX-600, Haval автомобильдеріне бұғат құйылған.
"Перизат Қайраттың тұрғылықты жерін тінту барысында қайырымдылыққа жиналған қаражатқа сатып алынған қымбат техника, Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada және т. б. сияқты танымал әлемдік брендтердің киім, аяқ киім, зергерлік бұйымдар, сөмкелері табылып, тәркіленді", - делінген хабарламада.
Тәркіленген мүлік заттай дәлелдемелер ретінде танылып, іс материалдарына қосылғаны айтылды. Тәркіленген заттар бойынша сот анықтайтын болады. Тергеу жалғасып жатыр.
ҚР ҚПК-нің 201-бабы тәртібіндегі өзге де ақпарат жарияланбайды.
"Егер сіз Перизат Қайраттың қаражаттың, жылжымайтын мүліктің және басқа да мүліктің (оның ішінде үшінші тұлғаларға ресімделген) орналасқан жері туралы ақпаратты білсеңіз, Қаржылық мониторинг агенттігіне немесе +7 (7172) 70-84-78, 70-84-79 (қосымша нөмірі: 21384) телефон нөмірі бойынша хабарласуыңызды сұраймыз", - делінген ҚМА хабарламасында.
Еске салайық, ол көктемгі су тасқынынан зардап шеккен азаматтарға көмек көрсету үшін, сондай-ақ Палестина тұрғындарына гуманитарлық көмек көрсету мақсатында жиналған 1,7 миллиард теңгеден астам қаражатты жымқырды деген күдікке ілінген болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!