АКШнын Улуттук чалгын кызматында 100дөн ашуун кызматкер иштен бошотулду

АКШнын Чалгын кызматынын жетекчиси Тулси Габбард мекеменин 15 агенттигинде иштеген 100дөн ашуун кызматкерин кызматтан кетирди. Ага себеп - өкмөттүк чат-платформаны жеке маселелерге колдонулганы деп айтылды. NBC News белгилегендей, платформада жеке жашоо, жынысты өзгөртүү жана саясатты талкуулаган учурлар бар.



Габбард Fox News агенттигине курган маегинде мындай темалардагы талкууга катышкандардын баарын кызматтан кетирүүнү буйруганын айтты. Жазаланган кызматкерлер жашыруун маалыматтарды окуу укугунан да ажыратылат. Габбарддын сөзүнө караганда чат Улуттук коопсуздук агенттигине таандык болгон. Ал ошондой эле бошотулган кызматкерлердин жүрүм-туруму "ишенимди одоно бузууга" жатарын жана "кесипкөйлүктүн негизги стандарттарын жана эрежелерин бузуу" болуп эсептелерин кошумчалаган.



Fox News каналына шейшембиде курган маегинде Габбард жумушчуларды кызматтан алуу - чалгын кызматтарындагы абийирсиз кызматкерлерди аныктоочу ири аракеттердин башталышы экенин белгиледи. Анын пикиринде, кадрдык өзгөрүүлөрдүн толкуну коомчулуктун чалгын кызматтарына ишеничин калыбына келтирүүгө тийиш.