Чаллыдан Знахарь позывнойлы хәрби контракт буенча хезмәт итә: Туган ил һәм әнкәй өчен
Чаллыдан Знахарь позывнойлы 47 яшьлек ир-ат контракт буенча хәрби хезмәттә. Тиздән аның алгы сызыкта булуына бер ел була.
«Үзе китте, үзе. Мин аны бармаска үгетләдем, ләкин ул үз сүзендә торды. Туган ил һәм әнкәй өчен, диде. Туган илне якларга барырга кирәк. Бөтенесен моннан куып җибәрергә. Бик яратам, бик горурланам. Ул гел шундый булды. Батыр, гадел. Ул әйбәт кеше. Бик әйбәт. Бернәрсәдән дә курыкмый. Бу очракта да курыкмады», - дип сөйләде хәрби хезмәткәрнең әнисе Светлана.
Акча өчен китмәде, дип өсти ир-атның якыннары. Ул Ярославльдә аз токлы системалар белән эшләүче электрик булып эшләгән, ә бу өлкәдә хезмәт хаклары югары. Улыбыз патриот булып үсте, аның өчен Туган илен һәм якыннарын яклау – приоритет, ди хәрби хезмәткәрнең әтисе. Саклану министрлыгы белән контрактны ул Чаллы хәрби комиссариатында төзегән.
«Мин, бәлки, үзем дә китәр идем, әмма мин карт инде. Алла сакласын, монда килсәләр, мин, әлбәттә, кулыма винтовка алачакмын. Менә шулай. Мин аның бу гамәлен тулысынча хуплыйм. Тулысынча. Без аның белән ирләрчә сөйләштек. «Әти, мин инде барысын да хәл иттем». «Ярар, хәл иткәнсең икән, димәк хәл иткәнсең. Син бу тормышта үзеңнең җитди карарларыңны кабул итәргә хокуклы». Мин моннан ары аны үгетләүнең мәгънәсен күрмәдем. Мин моның инде хәл ителгән мәсьәлә икәнен аңладым», — дип сөйләде хәрби хезмәткәрнең әтисе Вадим.
Знахарь позывнойлы хәрби хезмәткәр ялга кайтып килгән. Хәзерге вакытта ул Россия мәнфәгатьләрен һәм тыныч халыкны яклый. Ә ул алгы сызыкта чакта аның гаиләсе турында онытмыйлар. Мәсәлән, Республика көне алдыннан Чаллы мэры Наил Мәһдиев исеменнән азык-төлек продуктлары җыелмасы алып килеп биргәннәр.
«Махсус хәрби операция территориясендәге егетләрнең гаиләләре белән эш көн саен алып барыла. Бәйрәмнәр алдыннан гаиләләр янына киләбез, бүләкләр тапшырабыз», - дип уртаклашты Автозавод районы администрациясе башлыгы Айрат Хөснуллин.
Мондый азык-төлек продуктлары җыелмалары Үзәк, Автозавод һәм Комсомол районнарыннан махсус операциягә киткән хәрбиләрнең гаиләләренә тапшырылды. Администрация хезмәткәрләре билгеләп үткәнчә, алар хәрбиләрнең туганнары белән һәрвакыт элемтәдә, бу аларның өстенлекле бурычы.
1 августтан Татарстанда РФ Саклану министрлыгы белән контракт төзүчеләргә 1,7 миллион сумга якын акча бирелә. Түләүнең күләме арту РФ Президентының 1 августтан һәм ел ахырына кадәр махсус операция зонасында хезмәт итү өчен контракт төзегән хәрбиләргә 400 мең сум (195 мең урынына) күләмендә федераль түләүләр турындагы яңа указы белән бәйле.
Махсус хәрби операция РФ Президенты Владимир Путин карары буенча 2022 елның 24 февраленнән үткәрелә. Хакимият берничә тапкыр аның куелган максатларга ирешкәнче дәвам итәчәген белдерде. Максатлар арасында Россиянең иминлеген гарантияләүче шартлар булдыру да бар.
РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: (843) 221-44-52. Моннан тыш, 8 (800) 222 59 00 номеры буенча мөрәҗәгать итәргә була.
Материал Эльмира Гайнетдинова катнашында әзерләнде.