Хитойлик ўйинда ютган Maserati авмашинаси фақат ижара бўлиб чиқди

Хитойнинг Бинчжоу шаҳрида яшовчи эркак 14 февраль куни тун ярмида ташкил этилган бозорда болалар ўйинларидан бирида иштирок этиб, Maserati автомобилни ютиб олди, деб South China Morning Post хабар берди. Эркак ушбу ўйинга 280 доллар сарфлаган.

Ўйинда иштирокчи ҳалқаларни нишонга аниқ улоқтириши керак эди. Бош соврин эса тахминан 235 минг доллар қийматидаги Maserati автомобили бўлди.

Ван фамилияли эркак таваккал қилиб ўйинда қатнашган. У уч соат давомида 8 мингга яқин ҳалқа отган ва натижада бош мукофотга эга чиққан. Соврин соҳиби ҳалқа отишдан сўнг қўллари оғриб қолганини тан олди. Шунингдек, у бўш вақтларида баскетбол ўйнашни ёқтиришини ва “уч очколик” тўпларни моҳирона ташлашини ҳам қайд этди.

Бироқ, орадан вақт ўтиб, автомобиль Ваннинг мулкига ўтмаслиги, балки унга фақат бир йилга ижара сифатида берилиши аниқланди. Эркак киоск эгаси билан ютуқни пулга алмаштириш бўйича келишишга ҳаракат қилмоқда.

Баъзи интернет фойдаланувчилари Ван учун автомобилдан пул ишлаш йўлларини таклиф қилди. Улар орасида Maseratiни тўйларга ижарага бериш варианти ҳам мавжуд.