Кара-Суу бир мандаттуу округунда мөөнөтүнөн мурда өтүп жаткан парламенттик шайлоодогу талапкерлердин бири “тоскоолдуктардан улам” жарыштан чыкканын Фейсбукка жазды. Бирок ким тоскоолдук кылып жатканын ачык айткан эмес. 28-апрелде өлкөнүн түштүгүндөгү бир мандаттуу үч округда шайлоо өтөт.
Казакстанда суу ташкын жети кишинин өмүрүн алганын Ички иштер министрлиги билдирди. Суу каптаган он облустан 117 миңдей киши эвакуацияланды. Анын 40 миңдейи балдар. Үй-мүлкү суу астында калгандар бийликтен кенемте маселесин чечип берүүнү талап кылууда. Орусияда да кырдаал оор экени кабарланды.
Улуттук “Манас” театры жаңы имаратка ээ болду. Маданий жай мурдагы "Манас айылы" этнографиялык комплекси жайгашкан жерге салынган. Имаратта 300 орундуу концерттик зал бар. “Манас” театры мындан үч жыл мурун тузүлүп, байыртан келаткан төкмөлүк, манасчылык, дастанчылык өнөрдү аркалагандардын башын кошкон. Буга чейин алардын өзүнчө өнөрканасы болгон эмес.
Кемпир-Абад иши боюнча айыпталып, камакта жаткан оппозициялык саясатчы Равшан Жээнбеков абактагы дагы бир саясатчы Азимбек Бекназаров экөөнө психологиялык кысым көрсөтүлүп жатканын билдирди. Азырынча Жаза аткаруу кызматы мындай дооматка жооп бере элек.
