4-5 մլն արդեն հետ է գանձվել ու բյուջե վերադարձվել. Հովհաննես Սահակյանը՝ աշխատանքային կեղծ ստաժի մասին
2017 թվականին կենսաթոշակի իրավունք ունեցող շահառուների թիվը կազմել է 524.485: Այսօր իր պաշտոնավարման 100 օրն ամփոփող ասուլիսի ժամանակ նման հայտարարություն արեց Սոցիալական ապահովության պետական ծառայության պետ Հովհաննես Սահակյան: Նրա խոսքով՝ միանվագ նպաստ նշանակվել է 34.786 հոգու, խնամքի նպաստը՝ 8327 հոգու: Սահակյանը շեշտեց, որ տարեկան 250 հազար դիմում է ներկայացվում իրենց կառույցին։
«Որևէ միջնորդություն իր համար դեր չի խաղալու, ես ասել եմ, որ ամենալավ միջնորդը լինելու է ձեր լավ աշխատանքը, գնալու ենք առաջ, որևէ խնդիր ես չեմ տեսնում, բայց եթե կլինեն խնդիրներ, անպայման պատժվելու են»,- ասաց նա:
Հովհաննես Սահակյանը նկատեց, որ տարածքներ այցելելուց հիմնական խնդիրները ոչ իրավաչափ, ոչ հիմնավորված ստաժն է, որ ծառացած են իրենց համակարգի առաջ:
«Հայաստանը փոքր երկիր է, ունենք շատ հարևաններ, բարեկամներ, բոլորը տեսնում են, որ այս քաղաքացին չի աշխատել, բայց ավելի շատ թոշակ է ստանում, քան այն աշխատակիցը, ով օրուգիշեր տքնել է: Մենք ուզում ենք այս արդարությունը վերականգնել: Մենք ասում ենք՝ եթե դու այս տարիներին չես աշխատել, պետությունը քո համար ծերության նպաստ է սահմանել, իսկ նրանք, ովքեր շատ են աշխատել, պետք է դա ստանան կենսաթոշակային տարիքին անցնելուն պես»,- ասաց նա:
Հովհաննես Սահակյանը շարունակեց խոսել կեղծ ստաժի հետ կապված խնդիրների մասին և նշեց, որ այս գործընթացն սկսելիս վերցնում են այն գործատուներին, ովքեր ռիսկային են, ստուգում են՝ կեղծ է ստաժը, թե՝ ոչ.«Սա վերահաշվարկում են, և ավել վճարված գումարը հետ է գանձվում պետական բյուջե: Իսկ եթե հանցագործության տարրեր են նկատվում, դիմում են իրավապահ մարմիններին, ովքեր արդեն քննում են, պարզում, թե ովքեր են եղել մեղավորները: 3000 տարվա ստաժի առումով 14 միլիոնից ավել գումար ենք արձանագրել, ու 4-5 միլիոն արդեն հետ է գանձվել: Գործընթացը միշտ է եղել, բայց հիմա ավելի լայն թափով ենք շարունակում»,- նշեց Հովհաննես Սահակյանը
Սոցիալական ապահովության պետական ծառայության պետն իր այն աշխատակիցներին, որոնք անմիջապես աշխատում եմ ոլորտի շահառուների՝ տատիկ, պապիկների հետ, հորդորել է հոգատար ու համբերատար լինել:
«Եղել են թերացումներ, պատժվել են, եղել են լավ աշխատակիցներ, որ խրախուսվել են»,- եզրափակեց Հովհաննես Սահակյանը: