Բասկետբոլ. Ռայան Բոաթրայթը հեռացվել է Հայաստանի հավաքականից
Ստամբուլի «Բեշիքթաշում» խաղացող Ռայան Բոաթրայթն այլևս հանդես չի գա Հայաստանի հավաքականում: Այդ մասին լրագրողների հետ զրույցի ժամանակ ասել է բասկետբոլի Հայաստանի հավաքականի գլխավոր մարզիչ Նիկշա Բավցևիչը:
«Բոաթրայթն իր մակարդակը ցույց է տվել ամռանն անցկացրած խաղերում, սակայն կան որոշ բաներ, որոնք կուլ տալ չենք կարող: Բասկետբոլը թիմային մարզաձև է, և բոլորը պետք է այստեղ իրենց հավասար համարեն: Նման պահվածքն անընդունելի է: Նա այլևս չի հրավիրվի հավաքական, այդ հարցը փակված է»,- ասել է խորվաթ մասնագետը:
Հիշեցնենք, որ Բոաթրայթը միայն գիշերն էր ժամանել Հայաստան:
Հավաքականը նախապատրաստվում է Եվրոպայի առաջնության ընտրական փուլին: Թիմը նոյեմբերի 23-ին Տիրանայում ուժերը կչափի Ալբանիայի հետ, իսկ նոյեմբերի 26-ին Երևանում կհանդիպի Դանիային: