Ձմեռային շրջանում տրանսպորտի նախարարության մի շարք ստորաբաժանումներ կաշխատեն հատուկ ռեժիմով
Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, նախարարության լրատվական ծառայության հաղորդագրության համաձայն, ճանապարհների պահպանումն ու շահագործումն ապահովող ստորաբաժանումներին խիստ հանձնարարական է տվել առաջին իսկ տեղումների դեպքում, անկախ օրվա ժամից, ճանապարհների մաքրման և աղ ու ավազով մշակման աշխատանքներն անհապաղ սկսելու վերաբերյալ, այդ թվում և գիշերային ժամերին` չսպասելով լուսաբացին:
Եղանակային փոփոխություններով պայմանավորված՝ նախարարության համապատասխան ստորաբաժանումները աշխատելու են հատուկ ռեժիմով:
Ձմեռային տարեշրջանի ամբողջ ընթացքում նախարարության պաշտոնական կայքում և լրատվամիջոցներով պարբերաբար լրատվություն կտրամադրվի ավտոճանապարհների անցանելիության վիճակի վերաբերյալ, իսկ եղանակային պայմանների կտրուկ փոփոխության դեպքում օպերատիվ տեղեկատվության պարբերականությունը ըստ անհրաժեշտության կավելանա: «Այն քաղաքացիները, ովքեր կգտնվեն ճանապարհին և անհրաժեշտ պահին ինտերնետ կապի հնարավորություն չեն ունենա, կարող են ճանապարհների անցանելիության մասին ամբողջական, օպերատիվ տեղեկատվություն ստանալ նախարարությունում գործող (010) 56-25-33 տեղեկատու հեռախոսահամարով: Ճանապարհների ձմեռային սպասարկման շրջանում հեռախոսահամարը գործելու է շուրջօրյա», - ասված է հաղորդագրությունում:
Նախարարությունը վարորդներին հորդորում է երթևեկել բացառապես ձմեռային անվադողերով: