Լեոնիդ Ազգալդյանի հիշատակին անցկացվող քայլերթի մասնակիցները հայտարարեցին, որ մերժում են հերոսի անունով երկրորդային փողոցի վերանվանումը

Մի խումբ քաղաքացիներ  Երևանի փողոցներով քայլերթ են անցկացնում՝ ի մեծարումն «Ազատագրական բանակի» հիմնադիր, արցախյան ազատամարտի հերոս Լեոնիդ Ազգալդյանի: Եռագույն դրոշներով ու Լեոնիդ Ազգալդյանի նկարով երիտասարդները քայլում են ռազմահայրենասիրական երգերի հնչյունների ներքո:

Մինչ երթը նախաձեռնության անդամները Ազատության հրապարակում հայտարարեցին, որ Լեոնիդ Ազգալդյանի ծննդյան օրվա նախօրեին անցկացվող երթը նվիրված է հերոսի հիշատակին: «Մեր նպատակն է հիշեցնել, որ Լեոնիդ Ազգալդյանի անունով Երևանում որևէ առաջանային փողոց վերանվանելու պահանջը բացառապես հասարակական է, և չի կարելի խցկել ինչ-որ քաղաքական անցուդարձի մեջ: Լեոնիդ Ազգալդյանի անունով երկրորդային կամ երրորդային փողոց վերանվանումը մենք մերժում ենք»,-հայտարարեց նախաձեռնության անդամներից մեկը՝ նշելով, որ երթի ընթացքում չեն հնչելու ոչ մի այլ մտքեր ու խոսքեր:

Ներկայացվեց նաև երթուղին՝ Հյուսիսային պողոտա, Հանրապետության հրապարակ,  Ամիրյան, Մաշտոցի պողոտա, Խորենացի, Վազգեն Սարգսյան, Հանրապետության հրապարակ, Նալբանդյան և Ազատության հրապարակ:

Նշենք, որ բավական ժամանակ է կա նախաձեռնություն`  Լենինգրադյան փողոցը վերանվանել Լեոնիդ Ազգալդյանի անունով:

Հիշեցնենք, որ նոյեմբերի 16-ին տեղի է ունեցել Երևանի ավագանու Մշակույթի, կրթության և սոցիալական հարցերի մշտական հանձնաժողովի նիստը, որի ժամանակ քննարկվել են մի շարք փողոցներ անվանակոչելու նախագծերը: «Ելք» խմբակցությունը սեպտեմբեր ամսին ներկայացրել էր մի շարք փողոցների անվանակոչության նախագծերը, որոնց թվում էր նաև էր Լենինգրադյան փողոցն անվանակոչել Ազգալդյանի անունով:

Սակայն «Հանրապետական կուսակցություն» խմբակցության անդամները դեմ էին քվեարկել դրան և նախաձեռնությունը ստացել էր հանձնաժողովի բացասական եզրակացությունը, փոխարենը առաջարկելով Վերին Անտառային փողոցի մի հատվածն Արցախի հերոս Լեոնիդ Ազգալդյանի անունով անվանակոչել:  Այս անգամ ծավալված քննարկման արդյունքում նոր նախագիծը ստացավ դրական եզրակացություն: «Ելք» խմբակցությունը դեմ քվեարկեց նախագծին՝ նշելով, որ նպատակահարմար չի գտնում մեծանուն հերոսի անունով նման  ոչ նշանակալի փողոցն անվանակոչելը:

Տեղեկացնենք նաև, որ նոյեմբերի 29-ի Երևանի ավագանու նիստի օրակարգում են ընդգրկվելու նաև «Ամիրյան փողոցը Վռամշապուհ արքայի անունով անվանակոչելու մասին», «Լենինգրադյան փողոցը Լեոնիդ Ազգալդյանի անունով անվանակոչելու մասին», «Անաստաս Միկոյանի փողոցը Քըրք Քըրքորյանի անունով անվանակոչելու մասին», «Կասյանի փողոցը Վազգեն Առաջին Վեհափառի անունով անվանակոչելու մասին», «Ֆրունզեի փողոցը Ապրիլյան հերոսների անունով անվանակոչելու մասին» «Ելք» խմբակցության նախագծերը: