Զիմբաբվեի նախագահ Ռոբերտ Մուգաբեն հրաժարական է տվել՝ վերջ դնելով 37-ամյա կառավարմանը
Զիմբաբվեի նախագահ Ռոբերտ Մուգաբեն հրաժարական է տվել: BBC-ի փոխանցմամբ՝ այս մասին հայտնել է խորհրդարանի խոսնակ Յակոբ Մուդենդան:
Մուգաբեի նամակում ասվում է, որ որոշումը նա ինքնակամ է կայացրել և որ այդ որոշումն ընդունել է, որպեսզի իշխանության հեշտ անցում տեղի ունենա:
Անակնկալ հայտարարությունը վերջ է դրել Մուգաբեի դեմ իմպիչմենթի գործընթացով լսումներին, որոնք արդեն սկսվել էին:
Հայտարարությունից հետո օրենսդիրները ցնծում էին խորհրդարանում, իսկ փողոցներում հավաքված բնակիչները՝ տոնախմբում:
93-ամյա Մուգաբեն, ով երկիրը կառավարել է 37 տարի, մինչ այսօր ամենատարեց ղեկավարն էր ողջ աշխարհում: Նախօրեին նա հրաժարվել էր հրաժարական տալ՝ չնայած ռազմական ուժի կողմից գործադրվող ճնշումներին և բողոքի ցույցերին: