Տարկետման իրավունքի վերացմանը դեմ դուրս եկած երիտասարդների շարժումն իր նպատակին հասել է. Արտակ Զաքարյան
Պաշտպանության նախարարի առաջին տեղակալ Արտակ Զաքարյանը չի հասկանում այն մարդկանց, ովքեր զարմացել են ՀՀ նախագահ Սերժ Սարգսյանի կողմից «Զինվորական ծառայության և զինծառայողի կարգավիճակի մասին» օրենքի նոր նախագիծը ստորագրելու հանգամանքից:
Նա այսօր ԱԺ-ում լրագրողների հետ զրույցում նշեց, որ ուսանողների պահանջները կապված են Կառավարության որոշումների հետ: Արտակ Զաքարյանն ասաց, որ այս պահին օրենքի հետ կապված քննարկումները կլոր սեղանի շրջանակներում շարունակվում է:
«Այսօր մենք ունենք աշխատանքային խումբ, որտեղ ներառված են ուսանողները, դասախոսական, գիտական և այլ շահագրգիռ կողմերի հետ: Մեզ համար շատ օգտակար է այս աշխատանքը, ասեմ, որ օրենքի 22-րդ հոդվածի 5-րդ կետը քննարկում են, այսինքն՝ այն, որ կարողանանք հստակեցնել, թե որոնք են այն չափորոշիչները, որոնցով կարելի է հասկանալ, թե ովքեր են առանձնակի օժտված հնարավորություններով երիտասարդները, որոնք կարող են տարկետման իրավունք ստանալ Կառավարության կողմից»,- ասաց նա՝ նկատելով, որ առաջարկներ կան, որ որոնք գտնվում են քննարկման փուլում:
Արտակ Զաքարյանի գնահատմամբ՝ ակադեմիական տարկետման իրավունքի վերացմանը դեմ դուրս եկած երիտասարդների շարժումն իր նպատակին հասել է, այսինքն՝ օրենքում տեղ են գտել քննարկված առաջարկներից: Նրա խոսքով՝ այսքանից հետո օրենքից այլ բան պահանջելը տրամաբանական չէ: ՊՆ փոխնախարարը նաև հավելեց, որ «Պատիվ ունեմ» ծրագիրն ինքնին տարկետման իրավունք է, որից կարող են օգտվել 400-500 անձ: Նա անիրականանալի է համարում «Բանակը բերել բուհ» ծրագիրը, քանի որ կարծում է, թե հնարավոր չէ ծառայել ու զուգահեռ սովորել:
«Դրանք տարբեր մոդելներ են, միայն արդյունքում կունենանք շատ վատ կրթություն, շատ վատ ծառայությունը: Մենք հիմնովին բացատրել ենք, որ այդ գաղափարը զուտ ցանկություն է, որը կիրառական մեխանիզմներ մեր երկրի պարագայում չի կարող ունենալ»,- ընդգծեց Զաքարյանը:
Ինչ վերաբերում է մտահոգություններին, թե ապահովված ընտանիքների երեխաներն առողջական խնդիրների պատճառաբանմամբ կխուսափեն բանակից՝ կեղծ փաստաթղթեր ներկայացնելով, Արտակ Զաքարյանն ասաց, որ այդ խնդրի հիմա էլ կա:
Դիտարկմանը, որ ավագ դպրոցներում արդեն իսկ որոշ պաշտոնյաներ իրենց որդիների համար առողջական խնդիրներ ունենալու հետ կապված փաստաթղթեր են պատրաստում, Զարգարյանն արձագանքեց.«Ասեք ով, գնանք զբաղվենք, օդում եք ասում, մեր վրա մի դրեք բաներ, որոնք դուք եք ասում: Հիմա Ձեր ասածն օդում կրակոց է»: