Մի քանի տասնյակ քաղաքացիներ «Ես եմ» ծրագրում ընդգրկվելու դիմումներ են ներկայացրել Վ. Սարգսյան
Կառավարության այսօրվա նիստում ՀՀ պաշտպանության նախարար Վիգեն Սարգսյանը ներկայացրեց Հայաստանի Հանրապետության պաշտպանության նախարարության կողմից նշված վայրում և պայմաններում զինվորական ծառայություն անցնելու ցանկություն հայտնած շարքային կազմի պարտադիր զինծառայողի հետ պայմանագիր կնքելու կարգը սահմանելու մասին որոշման նախագիծը:
«Նախագծի նպատակն է ապահովել զինվորական ծառայության ու ծառայողի կարգավիճակի մասին ՀՀ օրենքով ամրագրված «Ես եմ» ծրագրի կիրառման գործընթացը: Նախատեսվում են ՀՀ ՊՆ-ի կողմից նշված վայրում և պայմաններում զինվորական ծառայություն անցնելու ցանկություն հայտնած քաղաքացիների դիմումների ներկայացման, զորակոչի կազմակերպման, նրանց հետ քաղաքացիաիրավական բնույթի պայմանագրի կնքման հետ կապված հարաբերությունները, պայմանագրի ձևը, զինծառայողների դրամական ապահովության չափերն ու իրային ապահովության չափաքանակները»,-ասաց նա:
Պաշտպանության նախարարն ասաց, որ արդեն ձմեռային զորակոչի ժամանակ, ինչպես պլանավորվել էր, ներդրվել է «Ես եմ» ծրագրի կիրառումը: «Այս պահին մի քանի տասնյակ քաղաքացիներ ներկայացրել են դիմումներ, հետաքրքրվածություն ծրագրի մեջ ընդգրկվելու, վստահ եմ, որ այս որոշումն ընդունելուց հետո, որովհետև շատերը հարցնում են, թե որտեղ է ֆիքսված գումարը, որ պետք է ստանան, պայմանները, որոնցով պայմանագիրը կարող է չեղյալ ճանաչվել, զինկոմիսարիատների աշխատանքի շնորհիվ այս թիվը կաճի»,-ասաց նա:
Նա նկատեց, որ պետք է հաշվի առնել, որ առաջին անգամ է սա արվում և համարում է, որ 100 զինծառայողի ներգրավումը այս ծրագրին արդեն լավ արդյունք կլինի: