Ֆրանսիացի զբոսաշրջիկը փորձել է 24 կգ կոկաին անցկացնել Նոր Զելանդիա
Նորզելանդական Պեյhիա քաղաքում ձերբակալվել է Ֆրանսիայի 26-ամյա քաղաքացի, որի մոտ 24 կիլոգրամ կոկաին է հայտնաբերվել: Այս մասին հայտնում է NZHerald-ը:
Աղբյուրի հաղորդմամբ՝ տղամարդը Նոր Զելանդիա է ժամանել կրուիզային նավով: Նրա մոտ հայտնաբերվել է մոտ 10.8 միլիոն դոլարի կոկաին. սա պատմության մեջ միանգամից առգրավված թմրանյութի ամենամեծ խմբաքանակն է:
Նշվում է, որ կասկածյալը ձերբակալվել է գաղտնի գործողության ընթացքում, որը կազմակերպել են ավստրալական իշխանությունները և տեղական ոստիկանությունը: Ֆրանսիացուն ցմահ ազատազրկում է սպառնում:
«Սա անդրազգային հանցախմբերի օրինակ է, որոնք փորձում են նոր երթուղիներ օգտագործել թմրանյութեր ներմուծելու համար: Մաքսային ծառայությունը գիտակցում է սա: Կարևոր չէ՝ ինչ է. կրուիզային նավ, ինքնաթիռ կամ բեռնարկղ՝ մենք ռիսկեր ենք փնտրում ամենուր», - պարզաբանել է մաքսային հետախուզության պետ Բրյուս Բերրին: