ՄԱԿ-ն իր մտահոգությունն է հայտնել Իրաքյան Քրդստանում տեղի ունեցող զարգացումների հետ կապված
ՄԱԿ-ն արձագանքել է Իրաքյան Քրդստանում արդեն երրորդ օրը շարունակվող բողոքի ցույցերին ու անկարգություններին և զսպվածության կոչ արել բոլորին, այս մասին գրում է nerinaazad.info կայքը:
ՄԱԿ-ի՝ Իրաքին ցուցաբերվող օգնությամբ զբաղվող հատուկ հանձնախումբն իր խորը մտահոգությունն է հայտնել Քրդստանում տեղի ունեցող զարգացումների հետ կապված և կոչ արել զերծ մնալ ծայրահեղական քայլերից:
Կառույցն ընդգծել է բռնության կիրառման անընդունելիության մասին և հայտնել, որ ցավում են այս դեպքերի հետևանքով զոհված քաղաքացիական անձանց համար:
Հիշեցնենք, որ օրերս քուրդ ցուցարարները դուրս են եկել Էրբիլի, Սուլեյմանիայի, Հալեփչեի, Դահուքի և մի քանի այլ քաղաքների փողոցներ, այրել «Քրդստանի հայրենասերների միություն», «Քրդստանի դեմոկրատական կուսակցություն» և «Քրդստանի իսլամական հասարակություն» (Կոմելա) կուսակցությունների գլխավոր շտաբերի շենքերը:
Քուրդ բնակչությունը դժգոհ է իշխանությունների՝ իրենց աշխատավարձերը չփոխանցելու և այլ պարտավորություններ չկատարելու համար, հայտնի է, որ բողոքի ակցիաներին միացել են բազմաթիվ պետական պաշտոնյաներ:
Նշենք, որ բողոքի ակցիաներին միջամտել են քրդական «փեշմարգայի» ուժերը, զինվորների ու ցուցարարների միջև բախումների հետևանքով գրանցվել է 90 վիրավոր, 5 մարդ մահացել է:
Նախօրեին Իրաքի վարչապետ Հայդեր ալ Աբադին հայտարարել է, որ Իրաքի դաշնային իշխանությունները չեն պատրաստվում «նստել մի անկյունում ու կողքից հետևել» Իրաքյան Քրդստանում զարգացող իրադարձություններին, և հարկ եղած դեպքում կմիջամտեն:
«Հյուսիսում տեղի ունեցող բողոքի ցույցերն Իրաքյան Քրդստանի ինքնավարության իշխանությունների սխալ քաղաքականության արդյունքն են: Կենտրոնական իշխանությունների պարտքն է ամբողջ երկրի տարածքում ապահովել իր քաղաքացիների ու նրանց պատկանող գույքի անվտանգությունը: Եթե բողոքի ակցիայի մասնակիցներին վնասեն՝ մենք ռազմական միջամտություն ցույց կտանք», - ասել է Աբադին: