Սասուն Միքայելյանը ՀՀԿ-ին առաջարկեց տանել, իրենց պատիվ տալ, քանի որ 2 ժամ դեռ այստեղ են լինելու. «Ելք»–ը 6-րդ ընդմիջումը վերցրեց
ԱԺ «Ելք» խմբակցությունը շարունակում է պահանջել ընդմիջումներ արդեն 6-րդ անգամ: Մինչ այդ ՀՀԿ պատգամավոր Սամվել Նիկոյանը վարման կարգով նշեց, թե գործընկերներին ևս մեկ անգամ ցանկանում է հորդորել, որ նրանց արածը գործընկերային հարաբերությունների դաշտից դուրս է: «Աղվան Վարդանյանն էլ խնդրեց մեկ անգամ, չընկալեցին…առաջին անգամ չէ նման իրավիճակը, բայց լուծում ունեցել է»,-ասաց նա և նշեց, որ «Ելք»–ը օգտվում է ԱԺ նախագահ Արա Բաբլոյանի բարեկիրթ կեցվածքով նիստը վարելու հանգամանքից:
«ԱԺ բնականոն աշխատանքները խանգարելու միտում կա, որին կարելի է այլ լուծում տալ: Եթե գնում են այդ ճանապարհով, անհրաժեշտություն կա վերանայել կանոնակարգը, բայց առաջարկում եմ այդ ճանապարհով չգնալ»,-ասաց նա:
Վարման կարգով ձայն խնդրեց նաև «Ելք» խմբակցության պատգամավոր Սասուն Միքայելյանը և խոսքն ուղղեց ՀՀԿ-ական Սամվել Նիկոյանին: «Քանի որ ընդմիջման նման չեք ունեցել, երկու ժամ դեռ էստեղ ենք, մեզի կարող եք պատիվ տալ»,-առաջարկեց նա:
Երբ հերթական նախագիծը դրվեց քվեարկության՝ վարման կարգով ձայն խնդրեց Նիկոլ Փաշինյանը և կրկին ԱԺ կանոնակարգ օրենքին հղում անելով վերցրեց 20 րոպե ընդմիջում:
ՀՀԿ-ական պատգամավորների նյարդերը դահլիճում տեղի տվեցին, նրանից մի քանիսը դժգոհելով տեղից վեր կեցան։ Հատկապես դժգոհ էր Սեյրան Սարոյանը, ով գոռգոռում էր դահլիճում, թե երեք հոգով 70 հոգու տանում բերում են: