Դժվար թե Թուրքիան իր առանցքի շուրջ ստեղծվելիք ռազմական բանակով մրցակցության մեջ մտնի ՀԱՊԿ-ի հետ, առճակատման գնա Ռուսաստանի հետ. Ս. Սաֆարյան
Հայաստանի համար Թուրքիայի առանցքի շուրջ ստեղծվելիք ռազմական ուժը ռիսկեր պարունակում է: Tert.am-ի հետ զրույցում նման կարծիք հայտնեց քաղաքագետ Ստեփան Սաֆարյանը՝ խոսելով իրանական լրատվամիջոցների փոխանցած տեղեկատվության մասին, որ Թուրքիան, Ադրբեջանը, Ղրղըզստանը և Մոնղոլիան պատրաստվում են ստեղծել «թյուրքական աշխարհի միասնական բանակ, եվրասիական ռազմական ուժ»:
Ստեփան Սաֆարյանն ասաց, որ այս ֆորմատը կոչված է թուրքական աշխարհի կոնսոլիդացմանը ամենատարբեր ոլորտներում:
«Այս հարթակի ստեղծման նախապատմությունը շատ ավելի հին է: Ի պատասխան Ռուսաստանի առանցքի շուրջ ձևավորված ինտեգրացիոն պրոցեսի ստեղծմանը՝ ԵԱՏՄ-ին, Թուրքիան ակտիվացրեց թուրքալեզու պետություններին միավորելու գործընթացը: Ուստի, կարելի է համարել, որ սա մրցակից պրոյեկտ է ԵԱՏՄ-ին, որը չի սահմանափակվում տնտեսական համագործակցությամբ: Դեռևս 2014թ.-ին Ղրղըզստանի, Ղազախստանի նախագահները ևս մասնակցում էին Թուրքիայի նախաձեռնած ֆորմատի հավաքներից մեկին ու փորձ էր արվում Եվրամիությունից պատճենել այն, ինչ պատճենել է նաև Ռուսաստանը՝ ստեղծել վերազգային միավոր: Սակայն, Թուրքիան, չուներ նման ռեսուրսներ, որ դա տարածվեր»,- հիշեցրեց Ստեփան Սաֆարյանը:
Քաղաքագետի խոսքով՝ դժվարություններ, տարաձայնություններ կային, թե ով պետք է միանա այդ ֆորմատին, ով ոչ, բայց ժամանակի ընթացքում Թուրքիան գտավ եղանակը:
«Վերջին տարիներին շատ էր խոսվում Թուրքիայի առանցքի շուրջ ռազմական դաշինքի ստեղծման մասին և նույնիսկ այս հարցերն այն աստիճան էին քննարկվում, որ Թուրքիա-Վրաստան-Ադրբեջան համատեղ զորավարժությունների ժամանակ այս մասին բացահայտ ակնարկվում էր: Այժմ մենք գործում ունենք հերթական մի մտադրության հետ»,- մանրամասնեց Սաֆարյանը:
Քաղաքագետը շեշտեց, որ Հայաստանը պետք է հաշվի նստի այս միության հետ, որովհետև դրան մասնակցում է հակառակորդ Ադրբեջանը. «Թուրքիան ընտրել է երկրներ, որոնք հնարավորություն են տալիս իրեն ամրապնդվել տարածաշրջանում՝ ընտրել են կենտրոնական Ասիան, Հարավային Կովկասը: Վրաստանն անտարբեր գտնվեց, չմիացավ, բայց, ամեն դեպքում, Թուրքիան ամեն ինչ անում է, որ իր դիրքերը ամրապնդի տարածաշրջանում: Հայաստանի համար սա ռիսկեր, իհարկե, պարունակում է»:
Սաֆարյանն ասաց, որ եթե ղարաբաղյան հակամարտության գոտում շիկացում լինի, դժվար է ասել, արդյոք այս ռազմական բանակը Թուրքիայի համար կդառնա՞ հարցին լեգիտիմ կերպով ներգրավվելու հարթակ, թե ոչ. «Դեռ պետք է սպասել որոշումներին, որոնք ընդունվելու են այս բանակի կողմից: Մենք բոլորս, չնայած գիտենք, որ ռուսական ռազմական ներկայացվածությունը անհամատեղելի ուժեղ է և դժվար թե Թուրքիան նման քայլի գնա, երբ Ռուսաստանի հետ երկարաժամկետ ծրագրեր իրականացնելու մտադրություն ունի: Թուրքիան դժվար թե ՀԱՊԿ-ի հետ առճակատման գնա, ամեն դեպքում օգտագործում է առիթը Հարավային Կովկասում դիրքերն ամրապնդելու համար»: