Супперлигада ўйнайдиган юз футболчи жисмоний тарбия бўйича тест синовидан ўта олмади

Футбол бўйича Ўзбекистон Супперлигасида иштирок этаётган 5 та жамоанинг юз нафардан ортиқ футболчиси белгиланган нормативлар бўйича тест синовларини топшира олмади.


Бу ҳақда хабар берган Футбол федерациясининг билдиришича, футболчилар учун белгиланган нормативлар асосидаги тест синови жорий йилда биринчи марта ўтказилди.


Тест синовидан мақсад Супперлигада иштирок этаётган футболчиларнинг жисмоний тайёргарлигини аниқлаш ҳамда терма жамоалар учун номзодларни танлаш бўлган.


Ҳозиргача тест синовини Супперлигада иштирок этувчи 12 жамоадан фақат “Олмалиқ”, “Машъал”, “Навбаҳор”, Қўқон-1912” ва “Цементчи” жамоалари футболчилари топширди. Тест 30 метрга югуриш, узоқликка сакраш, 7х50 югуруш ва “Yo-Yo” синовидан иборат бўлган.


Синовдан ўта олмаган футболчиларга Чемпионат бошлангунига қадар тайёргарлик кўриш ва тестни қайта топширниш имконияти берилди. Тест синовидан қайта ўта олмаган футболчилар Супперлигадан четлатилади.