دفاع وزارت "م.م" د پاکستان د استازې څرګندونې له حقیقت لېرې بولي
د ملي دفاع وزارت ویاند جنرال دولت وزیري پرون شپه دا خبره ازادي راډیو ته وکړه او ویې ویل ټوله نړۍ تائیدوي چې پاکستان د ترورېستانو امن ځاله ده.
په ملګرو ملتونو کې د پاکستان سفیرې ملیحه لودهي د ډیسمبر په ۲۱ مه ویلي په هېواد کې یې د ترورېزم امن ځالې نشته او د دې په خبره ترهګر د افغانستان په هغه ۴۰ فیصده خاوره کې ځای لري چې افغان حکومت پرې کنټرول نهلري.
پاکستان په داسې حال کې ځان د ترهګرو له ملاتړي سپین بولي چې د امریکا مرستیال ولسمشر مایک پنس تېره اوونۍ افغانستان ته په سفر کې ټینګار وکړ چې پاکستان له اوږدې مودې راهیسې تروریستي ډلو ته پناه ورکړې او لا هم دا کار کوي.