ناوالني د روسیې انتخاباتو کې د کاندېدو په خاطر ملاتړ تر لاسه کړی
الکسي ناوالني دا څرګندونې پرون په مسکو کې د خپلو شاوخوا ۸۰۰ پلویانو یوې غونډې ته وکړې.
ناوالني چې د ولادمیر پوتین یو منتقد او سیاسي مخالف دی پوتین یې یو "بد ولسمشر" یاد کړ او ویې ویل، په شلو ښارونو کې یې په کافي اندازه امضاوې ټولې کړي چې په مټ به یې په انتخاباتو کې د کاندید په صفت ځان ته لار هواره کړي.
هغه وویل، ټولو ته معلومه ده چې اوس پوتین ډېر ملاتړي نهلري:
"موږ ټولو سږ کال ولیده چې د روسیې په هېڅ ځای کې د پوتین «د روسیې ولسمشر ولادمیر پوتین» او د هغه د څوکۍ ډېر ملاتړي نشته."
ناوالني د مسکو په لېرمونتوف پارک کې خپلو پلویانو ته سره له دې چې حکومت د غونډې اجازه نهوه ورکړې خبرې وکړې.
د هغه پلویانو په ۱۹ نورو ښارونو کې هم ورته غونډې کړې دي.
د ۲۰۱۸ کال انتخاباتو ته ولسمشر ولادمیر پوتین هم ځان کاندیدوي او د الکسي ناوالني د کاندیدي مخه یې په دې نیولې چې دی په یوه جنايي قضیه کې محکوم پېژندل شوی او که چېرته له دې محکومیت خلاص شي یا په یوه خاصه توګه دا تورونه ترې لېرې شي انتخاباتو کې ګډون کولای شي.