Ամերիկուհուն «սպառած» էլեկտրաէներգիայի դիմաց 284 մլրդ դոլարի հաշիվ են ներկայացրել (լուսանկար)
ԱՄՆ-ի Փենսիլվանիա նահանգի բնակչուհի Մերի Հորոմանսկիին սպառած էլեկտրաէներգիայի համար աստղաբաշխական հաշիվ է ներկայացվել, գրում է goerie.com-ը՝ մանրամասնելով, որ խոսքը 284 մլրդ դոլարի մասին է:
Հորոմանսկիի խոսքով՝ ինքն ուղղակի շոկի է մատնվել, երբ տեղեկացել է Penelec էներգետիկ ընկերությանն ունեցած «պարտքի» մասին:
Հայտնի է, որ 58-ամյա ամերիկուհին այդ գումարը «պետք է» վճարի մինչ 2018թ. նոյեմբերը:
«Եթե վաճառենք մեր ունեցած-չունեցածը, ապա մեզնից ևս 100 տարի կպահանջվի հաշիվը մարելու համար»,-իրավիճակը մեկնաբանել է կինը:
Այնուհանդերձ՝ հարցը լուծվել է, երբ Հորոմանսկիի որդին զանգահարել է Penelec: Ընկերությունում խոստովանել են, որ սխալմունք է տեղի ունեցել: Համապատասխան ճշգրտումներ անելուց հետո պարզվել է, որ կնոջ պարտքն ընդամենը 284 դոլար է:
Հատկանշական է, որ միջադեպից հետո կինը որդուն խնդրել է Սուրբ Ծննդին իրեն սրտի աշխատանքին հետևող մոնիտոր նվիրել: