مسؤلین: شیر خان بندر کې افغان سوداګر هره ورځ یو لک ډالر زیان کوي

د کندز ولایت د سوداګرۍ او صنایعو خونه وايي، په دې وروستیو کې په شیر خان بندر کې د یو شمېر ګډوډیو او خپل سریو او دغه‌شان د پانګونې نامنظمې پالېسۍ ته په پام سره په دغه ولایت کې ۶۰ فیصده اقتصادي چارې ټکنۍ شوې دي.


د کندز د سوداګرۍ او صنایعو خونې عامل مدیر مسعود وحدت نن دوشنبه ازادي راډیو ته وویل، له څه باندې دوو کالو راهیسې شیر خان بندر د سرپرستانو له لوري اداره کېږي او دغه مسئله سوداګرو ته د اندېښنې وړ ده.


ښاغلی وحدت وايي، د راپورونو له مخې، په شیر خان بندر کې د دغو ګډوډیو او خپل سریو له امله افغان سوداګر او پانګه‌وال په ټوله کې په ورځ کې یو لک ډالر زیان کوي.


شیر خان بندر د افغانستان مهمه عایداتي سرچینه ده چې له تاجکستان سره ګډه پوله لري.