Եթե Ս.Սարգսյանը հայտարարի, որ վարչապետ չի լինելու, այ, այդ ժամանակ կտրուկ զարգացումներ կլինեն. քաղաքագետը հակադարձում է Փաշինյանին
Tert.am-ի հետ զրույցում քաղաքական վերլուծաբան Արմեն Բաղդասարյանը հակադարձելով Նիկոլ Փաշինյանի հայտարարությանը, որ եթե Սերժ Սարգսյանը վարչապետ առաջադրվի, երկրում իրավիճակը կտրուկ կսրվի, նշեց, որ հակառակը, եթե չառաջադրվի, երկրում կտրուկ զարգացումներ կլինեն: Ինչ վերաբերում է վարչապետ ժամանակ Սերժ Սարգսյանի քայլերին, ապա փորձագետի խոսքով` ոչինչ չի փոխվելու. ինչպես նախկինում Նախագահն ասում էր՝ այն վարչապետը, որը 7 տոկոսից պակաս տնտեսական աճ կապահովի, պիտի հրաժարական տա, սրանից հետո կասի՝ այն 1-ին փոխվարչապետը, ով չի կարողանում ապահովել 7 տոկոսանոց տնտեսական աճ, պիտի հրաժարական տա:
-Պարո՛ն Բաղդասարյան, այսօր ԱԺ-ում Նիկոլ Փաշինյանը հայտարարեց, որ «եթե Սերժ Սարգսյանն ի հեճուկս իր խոստման առաջադրվի վարչապետի թեկնածու, հանրապետությունում կտրուկ կսրվի ներքաղաքական իրավիճակը»:Կարծո՞ւմ եք, որ երկրում նման ընդդիմադիր պոռթկման համար ինչպես քաղաքական ուժերի, այնպես էլ շարքային քաղաքացիների շրջանում այդքան ներուժ կա:
-Ես կարծում եմ` եթե Սերժ Սարգսյանը հայտարարի, որ չի լինելու հաջորդ վարչապետը, այ, այդ ժամանակ իսկապես կտրուկ զարգացումներ կլինեն: Եվ հիմա ակնհայտ է, որ Սերժ Սարգսյանն է լինելու:
-Հետևաբար, անկեղծ չէ՞ Նիկոլ Փաշինյանը, թե քաղաքական կարճատեսության մեջ է: Ինչո՞ւ է նման բան ասում:
-Ինքը շատ լավ գիտի, ինքը քաղաքական գործիչ է, պարտավոր է առաջնորդվել արդեն կայացած փաստերով: Ինքը չի կարող շարժում սկսել, քանի դեռ այդ մասին պաշտոնապես չի հայտարարվել, չէ՞: Ուրիշ բան՝ նման քաղաքական պոտենցիալ կա, էդպիսի ուժեր կան, կամ հասարակության մեջ էդպիսի բողոքի ալիք բարձրացնելու պոտենցիալ կա՞... կարծում եմ՝ չկա, և ժամանակն էլ քիչ է նման մեծ ալիք բարձրացնելու համար: Պետք էր ավելի վաղ անել: 2 ամսից էլ քիչ ժամանակ է մնացել:
-1-ին փոխվարչապետի ինստիտուտի հետ կապված իրարանցումը ինչպե՞ս եք գնահատում. հիմա հայտնաբերեցին, որ Սահմանադրությամբ նման ինստիտուտ նախատեսված չէ:
-Իշխանության տրամաբանությունը ես այսպես եմ տեսնում, հաջորդ վարչապետը, այսինքն` Սերժ Սարգսյանը պիտի զբաղվի քաղաքական խնդիրներով՝ արտաքին քաղաքական և ընդհանուր ղեկավարման, իսկ տնտեսությամբ պետք է զբաղվի 1-ին փոխվարչապետը: Ամենայն հավանականությամբ՝ Կարեն Կարապետյանը: Կարծում եմ, որ Սերժ Սարգսյանն ընտրել է այդ մեխանիզմը, որովհետև տնտեսությամբ զբաղվող փոխվարչապետը, հաշվի առնելով տնտեսության, բնակչության սոցիալ-տնտեսական վիճակը, միշտ ավելի խոցելի է: Ինքն ուզում է խուսափել այս պատասխանատվությունից: Կրկնում եմ՝ սոցիալ-տնտեսական հարցերով պատասխանատվությունից:
-Այսինքն՝ հետայսու էլ պահանջվելու է 1-ին փոխվարչապետի՞ց։
-Ինչպես նախկինում Նախագահն ասում էր՝ այն վարչապետը, որը 7 տոկոսից պակաս տնտեսական աճ կապահովի, պիտի հրաժարական տա: Սրանից հետո կասի՝ այն 1-ին փոխվարչապետը, ով չի կարողանում ապահովել 7 տոկոսանոց տնտեսական աճ, պիտի հրաժարական տա: Ընդամենը տերմինների փոփոխություն է լինելու: Չէ՞ որ ինքը երբևէ հրապարակային պատասխանատվություն չի ստանձնել երկրի սոցիալական ու տնտեսական վիճակի համար: Ինքը` որպես Նախագահ, արբիտրի դերում է եղել:
-Հետևելով՝ Ձեր նշած տրամաբանությանը, կարելի՞ է ասել, որ հաջորդ կաբինետը բաղկացած է լինելու լայն կոալիցիայից, պատասխանատվությունը տարբեր քաղաքական ուժերի միջև բաշխելու և նորից արբիտրի դերում լինելու տեսանկյունից: Դաշնակցություն, «Ծառուկյան» դաշինք…
-Դաշնակցության հետ կոալիցիան, միանշանակ, կկազմվի: «Ծառուկյան» դաշինքի հետ կոալիցիա կազմելը քիչ հավանական եմ համարում:
-Ամենայն հավանականությամբ՝ ապրիլից հետո նախագահ Ալիևը և վարչապետ Սերժ Սարգսյանը նոր կարգավիճակով, բայց հին կազմով շարունակելու են պաշտոնավարել: Այսպիսով` ստացվում է նաև հակամարտող կողմերի համար բանակցությունների շարունակականությո՞ւն:
-Շարունակականություն են ապահովում, և, որպես կանոն, երբ միջնորդներն ասում են՝ քայլերն արագացրեք, միշտ պատճառաբանություն է բերվում, որ առջևում ընտրություններ են, չենք կարող: Եվ որպես կանոն, բանակցությունները թողնվում են ընտրություններից հետոյի: Հիմա, ըստ իս, պատճառներից մեկն էլ դա էր, որ Ալիևն իր ընտրությունը տեղափոխեց ապրիլ, երբ արդեն երկուսն էլ նոր կարգավիճակներում և իրավիճակում, երբ առջևում այլևս 4-5 տարի ընտրություններ չեն լինելու,իրենք կարող են ավելի հանգիստ բանակցել, ավելի ազատ լինել, ավելի պոպուլիստական չլինել, վախենալու բան չունենան:
-Բաքվում ՄԽ համանախագահության հետ հանդիպումից հետո հայտարարվեց, որ հետընտրական շրջանում լինելու են ինտենսիվ բանակցություններ: Կարելի՞ է ենթադրել, որ բանակցային պրոցեսն ակտիվանալու է, և արդեն կողմերին, հարկադրելու են ի կատար ածել փոխզիջումներ:
-Կարծում եմ, որ ապրիլից հետո միջնորդները, այո, ավելի ակտիվորեն կփորձեն ազդել կողմերի վրա և ակտիվացնել: Հենց այն պատճառով, որ արդեն ներքաղաքական գործընթացները մղված են լինելու երկրորդ պլան: Միջնորդները փորձելու են բանակցային պրոցեսն ակտիվացնել, ավելի վճռական լինել: Կստացվի, թե չէ, չեմ կարող ասել: Ադրբեջանն ինչ-որ շատ ագրեսիվ է: Եթե նկատի ունենանք իր այս վերջին հայտարարությունը ( որ Երևանը հինավուրց ադրբեջանական տարածք է), ապա նման հայտարությունները բանակցային գործընթացին չեն նպաստում: