ზამთრის ოლიმპიური თამაშების მეთორმეტე დღეს პირველი ოქროს მედლით იტალიელებმა გაიხარეს. სწრაფდაშვებაში ქალთა შორის ოლიმპიური ჩემპიონი გახდა სოფია გოჯა, რომელმაც დისტანცია 1:39,22 წუთში დაფარა და უახლოეს მდევარს, ნორვეგიელ რაგნილდ მოვინკელს, 0,09 წამით აჯობა. მოვინკელი “პიონჩანგი 2018”-ზე მეორე ვერცხლის მედალს დაეუფლა: სწრაფდაშვებამდე ის გიგანტურ სლალომში ავიდა კვარცხლბეკზე. მესამე საპრიზო ადგილი ამერიკელმა ლინდსი ვონმა დაიკავა, რომელიც სოფია გოჯას 0,47 წამით ჩამორჩა.
