Ահազանգ է ստացվել, որ Մատենադարանի գիտական մասնաշենքում տեղի ունեցած միջոցառման ժամանակ գողացել են արույրից պատրաստված երկու ափսե
Մատենադարանի ցուցասրահների վարիչ Աիդա Չարխչյանը տարակուսած է տեղեկությունից, որ Մատենադարանի մասնաշենքերից մեկում կազմակերպված միջոցառման ժամանակ արույրից պատրաստված արժեքավոր ափսեներ են գողացել:
«Մատենադարանում ցուցադրվում են միայն արժեքավոր գրքեր և ձեռագրեր: Նյութական առարկաներ՝ ո՛չ ափսե, ո՛չ որևէ այլ իր, չի կարող ցուցադրվել անգամ թեմատիկ ցուցադրություններին: Ու մեզ մոտ, առհասարակ, որևէ գողություն չի եղել»,-Tert.am-ին ասաց Աիդա Չարխչյանը:
Ինչ վերաբերում է հարցին, թե հնարավո՞ր է, որ խոսքը միջոցառման ժամանակ ֆուրշետի ափսեների մասին է, տիկին Աիդան նշեց, որ նման դեպքերում Մատենադարանը պատվիրում է, ընկերությունը բերում է սնունդը, սպասքը: «Շարում են, հյուրասիրում, հսկում, հավաքում»:
Tert.am-ին ՀՀ ոստիկանությունից հայտնեցին, որ երեկ ժամը 19.30-ին հաղորդում է ստացվել, որ ժամը 17.00-18.00 ընկած ժամանակահատվածում Մատենադարանի գիտական մասնաշենքից գողացել են արույրից պատրաստված 2 ափսե: Կատարվում է հետաքննություն: