Չեմ հասկանում, թե ինչ հիմքերով ու մեթոդներով են պայքարելու Սերժ Սարգսյանի՝ վարչապետի թեկնածու առաջադրվելու դեմ. Լ. Սարգսյան
Անկեղծ ասած՝ ես չեմ հասկանում՝ ինչ հիմքերով ու մեթոդներով են պայքարելու Սերժ Սարգսյանի՝ վարչապետի թեկնածու առաջադրվելու դեմ:
Tert.am-ի հետ զրույցում նման տեսակետ հայտնեց Վերակազմյալ Սոցիալ-դեմոկրատ հնչակյան կուսակցության ատենապետ, ԱԺ նախկին «ՀԱԿ» խմբակցության պատգամավոր Լյուդմիլա Սարգսյանը:
«Այլ հարց է՝ դա մեզ ինչքանով է գոհացնում կամ չի գոհացնում, բայց ըստ Սահմանադրության՝ դա մեծամասնության իրավունքն է, և եթե մեծամասնությունը նպատակահարմար գտնի առաջադրել Սերժ Սարգսյանին, չեմ կարծում, որ որևէ քաղաքական ուժ կարող է խոչընդոտել. ի՞նչ կերպ պետք է խոչընդոտեն»,- ասաց նա:
Հիշեցնենք, որ մամուլը գրել էր, թե չի բացառվում, որ առաջիկայում ընդդիմությունը, մասնավորապես՝ «Ելք» դաշինքը դուրս գա փողոցային պայքարի: Խմբակցության ղեկավար Նիկոլ Փաշինյանը գրառում էր կատարել և նշել, որ պատրաստ է կրկին «գործուղվել» Ազատության հրապարակ:
Իսկ ավելի վաղ հայտարարել էր, որ եթե Սերժ Սարգսյանը որոշի առաջադրվել, դա կարող է կտրուկ սրել ՀՀ-ում ներքաղաքական վիճակը:
Լյուդմիլա Սարգսյանը չի հավատում, որ խնդրի շուրջ կարող է լայն համախմբում ձևավորվել: «Այն էլ այս շրջանում, երբ ժողովրդի մոտ խոր ապատիա է, և, ըստ էության, չի էլ հուզում ժողովրդին, թե ով կլինի վարչապետ, քանի որ իրենց կյանքում դրանից ոչինչ չի փոխվելու, կլինի Սերժ Սարգսյանը, Կարեն Կարապետյանը թե մեկ ուրիշը»,- ասաց նա:
ՎՍԴՀԿ ատենապետը նկատեց, թե այդ խնդրին վերաբերվում է որպես քաղաքական գործընթացի, որտեղ ընդդիմությունը փորձում է ևս մեկ անգամ ընդգծել իր տեղն ու դերը քաղաքական պրոցեսների մեջ:
«Բայց իրավական առումով չեմ կարծում, որ դա հնարավոր է խոչընդոտել, և չի ստացվելու դա, հետևաբար լավ եմ վերաբերվում, որ քաղաքական ուժերը փորձում են ինչ-որ ակտիվացման պրոցես տանել, նաև ժողովրդին արթնացնել, բայց չեմ կարծում, որ կլինի այն քանակությամբ ժողովուրդ, որը կարող է իր դժգոհության արտահայտման ձևով որոշակի զգուշավորության պարտադրել ՀՀԿ-ին, որ նա վերանայի իր ցանկությունն ու մոտեցումը: Ես ապագա չեմ տեսնում այդ գործընթացի մեջ»,- ասաց նա:
Հարցին, թե «Ելքի» շուրջ այլ քաղաքական ուժերի համախմբում հնարավոր համարում է, Լյուդմիլա Սարգսյանը առաջարկեց հերթականությամբ նայել քաղաքական ուժերին և ըստ այդմ ենթադրել, թե ով կարող է այդ գործընթացին միանալ:
«Ոչ մի մեծ քաղաքական ուժի՝ կլինի «ՀԱԿ»-ը թե «Ժառանգությունը», միացման հնարավորությունը չեմ տեսնում: Կմիանան առանձին քաղաքական գործիչներ, առանձին մարդիկ, քաղաքական դեմքեր, բայց պատկերը չի փոխվի, այսինքն՝ չի դառնա այն քաղաքական ակտիվ ուժը և չի բերի հասարակության ակտիվացմանը, որով կարող են ինչ-որ ձևով, իրավունքով կամ պարտադրանքով հասնել Սերժ Սարգսյանի վարչապետության կասեցմանը: Ամեն ինչ կանխորոշված է, պարզ է, բայց կանխատեսելի էր, որ նման բան կնախաձեռնվեր, որովհետև արմատական ընդդիմություն է ձևավորվում ԱԺ-ում , բայց դա բավարար չէ, որ Սերժ Սարգսյանը վարչապետ չդառնա»,- եզրափակեց նա: