Վոլոդյա Ավետիսյանը «Ազատության» հրապարակում նստացույց է սկսել
«Արժանապատիվ ազատամարտիկ» ՀԿ նախագահ, պահեստազորի գնդապետ Վոլոդյա Ավետիսյանն այսօր Ազատության հրապարակում նստացույց է սկսել: Նրան են միացել իր համակիրները, ովքեր, այսպիսով, բողոքում են դատարանների կողմից կայացված վճիռների դեմ, փորձում են կանխել իշխանությունների վերարտադրությունը:
«Մենք ժողովրդին կոչ ենք անում միավորվել հանուն Հայաստանի փրկության, ազատության, արդարադատության հաստատման»,- Tert.am-ի հետ զրույցում ասաց Վոլոդյա Ավետիսյանը:
Նա նշեց, որ ուզում են Ազատության հրապարակում քննարկումներ անցկացնել, մարդկանց կողմից խորհուրդներ ու տեսակետներ լսել, թե ինչպես կարելի է արդյունավետ դարձնել պայքարի այս ճանապարհը:
«Մենք այս ամենն անում ենք ժողովրդի համար, ժողովրդին ենք ուզում միավորել: Ուզում ենք, որ ընդդիմադիրները սթափվեն՝ համախմբվեն հայրենիքի փրկության համար»,- ավելացրեց նա:
Հարցին՝ որքա՞ն եք շարունակելու նստացույցը, Ավետիսյանը պատասխանեց, որ իրենց պայքարը հավերժ է, միայն նստացույցով չէ, հանդիպումներ են անում կուսակցությունների, քաղաքացիական հասարակության հետ: Ըստ նրա՝ իրենց այցելել են դեռևս միայն «Հանուն Հայաստան պետության ճակատի» անդամները, այլ կուսակցություններից ներկայացուցիչներ Ազատության հրապարակ չեն գնացել: