12-ամյա ֆուտբոլիստ Էրիկը և լրագրող Սամվելը՝ Ֆուտբոլը Հանուն Բարեկամության ծրագրում Հայաստանը ներկայացնելու մասին
«Ֆուտբոլը Բարեկամության Համար» ծրագրում Հայաստանը այս տարի ներկայացնելու են Ավանի ֆուտբոլի ակադեմիայի սան Էրիկ Հարությունյանը և պատանի լրագրող Սամվել Գևորգյանը:
Armsport.am-ը զրուցել է 12-ամյա տղաների հետ, ովքեր մեծ ուրախությամբ պատրաստվում են ամռանը Մոսկվայում կայանալիք միջոցառումներին.
Էրիկ Հարությունյան. «Ուրախ եմ, որ ես ընտրվեցի:
Ամեն ինչ արեցի մարզումների ընթացքում: Տանը մեծ ուրախությամբ ընդունեցին իմ գնալու հանգամանքը: Հավաքվեցինք, քեֆ արեցինք (ծիծաղում է,- խմբ.): Մայրս և հայրս շատ ուրախացան իմ ընտրվելու առթիվ:
Ուզում եմ ճանաչել իմ ապագա ընկերներին, կարդում եմ իրենց մասին: Այստեղ ինձ շատ օգնեցին, ուրախացան ինձ համար: Ակադեմիայում բոլորս հավասար ենք: Լավ է, որ լեզուների իմացությունն օգնեց ինձ, ես շնորհակալ եմ ուսուցիչներիս»:
Պատանի լրագրող Սամվել Գևորգյանը, ով մրցաշարում ևս իր մեծ ներգրավածությունն է ունենալու, ասաց. «Շատ ուրախ եմ, որ ես եմ ներկայացնելու Հայաստանը: Ակտիվ եղա, տեսանյութեր պատրաստեցի, նաև հարցազրույց վերցրի: Լրագրողական կրթությունը մայրիկից եմ ստացել, ով լրագրող է: Ես շատ եմ սիրում ֆուտբոլ, նաև լրագրություն: Հնարավոր է մարզական լրագրող դառնամ»: