Yañı hastahanelerniñ qurulışı Qırımda «acele yardım»da olğan kadrlar meselesini çezmey – yerli ekim

İlhaq etilgen Qırımda «acele yardım» hızmeti ilk-evelâ mütehassıslarnıñ yetişmemezliginden dolayı qıynala ve yañı hastahanelerniñ qurulışı onıñ problemini çezip olamaz, dep saya Aqyar ana ve bala sağlığını saqlav Merkeziniñ sabıq üyken bala LOR-ekimi Yuriy İskrenko. Bu fikirni o martnıñ 21-nde Qırım.Aqiqat Radiosı efirinde beyan etti.


 ««Acele yardım» çağırılğanda keç qaluvınıñ sebebi esasen mütehassıslarnıñ yetişmeyuvından dolayıdır. Tecribeli ekimlerniñ ekseriyeti 2014 senesinden soñ qartayğanları içün boşap ketti.


 «Acele yardım» – esasen insanlar, esasen anda çalışqan ve tecribeli yardım köstergen hadimler demektir. Mütehassıs meselesi çezilmegence, hastahane odaları pek yahşı, normal olğan taqdirde bile, bu meseleni çezip olamaz», – dep qayd ete tibbiy hadim.


Daa evel Qırımnñ «Primeçaniya» neşiri haber etkenine köre, Aqyarda «acele yardım» hastahanesini qurğan şirket anlaşma muddetine qatiyen uymağan. 2016 senesi dekabrniñ 22-nde 4,9 milliard rublelik añlaşma, «SGM Grup» şirketinen yarışma keçirilmeden imzalanğan. Hastahane binası 2019 senesiniñ soñunda teslim etilmek kerek olsa da, leyha işleri ale daa yerinden qozğalmağan.