Իսպանացի պատգամավորները մերժել են Հայոց ցեղասպանության մասին բանաձևը

Իսպանիայի խորհրդարանի ստորին պալատի՝ Կոնգրեսի արտաքին հարցերով հանձնաժողովը ձայների մեծամասնությամբ մերժել է Օսմանյան կայսրության տարածքում հայ բնակչության կոտորածները որպես Ցեղասպանություն ճանաչելու մասին բանաձևը:

Ինչպես հայտնում է hispanatolia.com կայքը, միջնորդությունը ներկայացվել էր «Կատալոնիայի ձախական հանրապետականներ» կուսակցության կողմից: Նշվում է, որ բանաձևը Անատոլիայում հայ ժողովրդի դեմ իրականացված ցեղասպանությունը ճանաչելուց բացի, պարտավորեցնում էր Իսպանիայի կառավարությանը երկխոսություն սկսել Թուրքիայի հետ՝ հորդորելով վերջինիս ճանաչել Հայոց ցեղասպանության փաստը:

Բանաձևը մերժվել է 17 դեմ, 9 կողմ ձայնով, ևս 9 պատգամավոր ձեռնպահ է մնացել: Բանաձևի ընդունմանը դեմ են քվեարկել իշխող Ազգային կուսակցության 14 և «Սիուդադանոս» («Քաղաքացիներ») կուսակցության 3 պատգամավոր: