Անգլիայում կինը Cartier-ի թանկարժեք մատանիներ է հայտնաբերել սկեսրոջ հին իրերում (լուսանկարներ)
Անգլիական Սոմերսեթ կոմսության բնակչուհին որոշել է մաքրել բնակարանը և ազատվել հին իրերից, որոնք թողել էր իր սկեսուրը, սակայն առաջին հայացքից անպետք թվացող իրերի մեջ անսպասելիորեն գանձ է հայտնաբերվել: Ուշագրավ պատմությանն անդրադարձել է Metro-ն:
Նշվում է, որ կինը մի տուփի մեջ է հավաքել անպետք իրերը և տարել անտիկվար իրերի գծով մասնագետ Գարետ Ուոսպի մոտ, որպեսզի նա գնահատի դրանց արժեքը։ Կինը կարծել է, որ ինքը դրանց դիմաց մեծ գումար չի ստանա ու կնվիրաբերի բարեգործության համար:
Ի զարմանս բոլորի՝ մասնագետն այս բոլոր հին իրերի մեջ Cartier-ի երկու տուփ է գտել, որում երկու մատանի է եղել՝ ադամանդով ու շափյուղայով:
«Անմիջապես ուշադրություն դարձրի Cartier-ի տուփերի վրա, սակայն դրանց մեջ ոչ միշտ են զարդեր լինում: Երբ տեսա այս մատանիները, ինձ ցնցեց դրանց հազվադեպությունը: Մատանիները թանկ են ու մի ամբողջ կարողություն արժեն», - ասել է Ուոսպը:
Հազվագյուտ մատանիների թանկարժեքության մեջ համոզվելու համար մասնագետը դիմել է ոսկերիչներին, որոնց նույնպես զարմացրել է գանձը: Գնահատողները հաստատել են Cartier ոսկերչական տան մատանիների իսկությունը. մի մատանին 4 կարատ քաշով ադամանդով է, մյուսը՝ շափյուղայով:
Կինը շատ է զարմացել անսպասելի լուրից, սակայն համաձայնել է, որ այն վաճառվի աճուրդով: Ադամանդով մատանին վաճառվել է 60 հազար դոլարով, իսկ շափյուղայով մատանին՝ 40 հազար դոլարով:
Ուոսպի խոսքով՝ հենց այսպիսի բաներն են իր աշխատանքի առավելությունները:
«Խորհուրդ եմ տալիս ավելի հաճախ ստուգել հին տուփերը. հնարավոր է՝ ձեզ մոտ էլ որևէ շատ արժեքավոր բան լինի», - ասել է նա: