Տարեսկզբից աճ են արձանագրել տնտեսության բոլոր ճյուղերը՝ առանց բացառության. տնտեսական զարգացման և ներդրումների փոխնախարար
Տարեսկզբից աճ են արձանագրել տնտեսության բոլոր ճյուղերը՝ առանց բացառության: Հայաստանի տնտեսությունը վերելքի փուլում է: Tert.am-ի հետ զրույցում ասաց տնտեսական զարգացման և ներդրումների նախարարի տեղակալ Տիգրան Խաչատրյանը: Ըստ նրա՝ արդյունաբերությունը շարունակում է լինել տնտեսության առաջատար ճյուղերից մեկը, շինարարության ճյուղը բարձր տեմպերով վերականգնվում է, նախորդ տարվա անկումից հետո սկսել է աճ արձանագրել գյուղատնտեսության ճյուղը: Տիգրան Խաչատրյանը նշեց, որ իրենք հավատում են՝ բարձր տնտեսական աճի ներկա դրսևորումներն ունեն երկարաժամկետ բնույթ, և այս տարվա իրենց կանխատեսումները կիրականացվեն առանց էական շեղումների։
-ՀՀ վիճակագրական կոմիտեն հրապարակեց այս տարվա 3 ամիսների տնտեսական հիմնական ցուցանիշները։ Ինչպե՞ս կգնահատեք, ա՞ճ, թե՞ անկում է գրանցվել:
- Դրանք շարունակում են նախորդ տարվա դրական միտումները։ 2017 թվականի տնտեսական ակտիվության ցուցանիշը նախորդ 5 տարիների համեմատությամբ աննախադեպ բարձր էր՝ 107․7% , այս տարվա հունվար – ապրիլ ամիսներին այն շարունակում է արձանագրել զգալի աճ՝ 110․6%։ Հատկանշական է նաև, որ շարունակում է բարձր մնալ ապրանքների արտահանման աճը՝ 34․4%:
Տարեսկզբից աճ են արձանագրել տնտեսության բոլոր ճյուղերը՝ առանց բացառության։ Արդյունաբերությունը շարունակում է լինել տնտեսության առաջատար ճյուղերից մեկը՝ առաջին եռամսյակում աճելով 8․2 տոկոսով։ Բարձր տեմպերով վերականգնվում է շինարարության ճյուղը, որի թողարկման ծավալը նախորդ տարվա համեմատությամբ աճել է 23 տոկոսով։ Նախորդ տարվա անկումից հետո սկսել է աճ արձանագրել գյուղատնտեսության ճյուղը՝ այս տարվա առաջին եռամսյակում աճելով 2․2 տոկոսով։
Երկնիշ աճ են արձանագրել առևտրի շրջանառությունը և ծառայությունների ծավալները՝ համապատասխանաբար կազմելով 12․9 տոկոս և 16․5 տոկոս։ Նշված երկու ուղղություններն ուղղակիորեն պայմանավորված են ներգնա զբոսաշրջության ծավալների բարձր աճով, որն ինչպես նախորդ տարում, այնպես էլ այս տարվա առաջին եռամսյակի ընթացքում, մեր գնահատականներով, ապահովել է մոտ 20% աճ։
- Ինչի՞ մասին են վկայում այս ցուցանիշները:
- Նշված բոլոր զարգացումները փաստում են, որ Հայաստանի տնտեսությունը գտնվում է վերելքի փուլում։ Միաժամանակ, տնտեսական բարձր աճի աղբյուր համարվող նախաձեռնությունները և ծրագրերը շարունակական աջակցության և իրենց զարգացմանը նպաստող միջավայրն ամրացնելու կարիք ունեն։ Դրանք շարունակելու են գտնվել ՀՀ կառավարության և հատկապես ՀՀ տնտեսական զարգացման և ներդրումների նախարարության ուշադրության կենտրոնում, կարգավորելով առաջացող հարցերը և ուժեղացնելով այն նախադրյալները, որոնք պետք է ապահովեն յուրաքանչյուր բիզնես ծրագրի հաջողությունը։ Մենք հավատում ենք, որ բարձր տնտեսական աճի ներկա դրսևորումներն ունեն երկարաժամկետ բնույթ և այս տարվա մեր կանխատեսումները կիրականացվեն առանց էական շեղումների։