Aqmescitte, qırımtatarlarnıñ sürgün etilmesiniñ yıllığına bağışlanğan edebiyat aqşamı keçti

Mayıs 13-te Aqmescitte mayıs 18-ge – qırımtatarlarnıñ sürgün etilmesiniñ yıllığına bağışlanğan edebiyat aqşamı keçti. Aqşamda 50-ge yaqın kişi iştirak  etti.


Qırım.Aqiqat muhbiriniñ bildirgenine köre, qırımtatar şaireleri Seyare Kokçeyeva-Useynova, Maye Abdulganiyeva ve Aliye Kenjaliyeva em sürgün etilüv mevzusına, em de Qırımdaki zemaneviy vaqialarğa bağışlanğan şiirlerini oqudılar.


Qırımtatar faaliyetçisi Nariman Celâl: «Tedbirniñ maqsadı, mayıs 18-niñ arfesinde er bir qırımtatarğa kelgen eyecanlar ve fikirlerni şiiriy şekilde ifade etmek. Menim fikrimce, muellifler bunı yapa bildi. Bugünki aqşamda oqulğan bütün şiirler doğrudan-doğru, betke qarşı degil de, mecaz yolunen – halqımıznıñ içki eyecanlarını pek doğru ifade eteler», – dep ikâye etti.


Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.