Սիրիայի ընդդիմությունը բանակցությունների համար Աստանա է ժամանել
Ղազախստանի արտաքին քաղաքական գերատեսչության մամուլի ծառայության ղեկավար Անուար Ժայնակովը հայտարարել է, որ սիրիական զինված ընդդիմության ներկայացուցիչները ժամանել են Աստանա՝ մասնակցելու կայանալիք բանակցություններին:
«Սիրիական զինված ընդդիմության ներկայացուցիչները՝ 24 հոգի, վաղ առավոտյան ժամանել են Աստանա: Պատվիրակությունը ղեկավարում է Ահմադ Տոման»,- Ժայնակովի խոսքը մեջբերում է gazeta.ru-ն:
Նշվում է, որ սիրիական հակամարտության խաղաղ կարգավորման թեմայով «Աստանա 9» լիագումար նիստը կկայանա երևանյան ժամանակով ժամը 13:00-ին:
Աղբյուրը մանրամասնում է, որ սիրիական հարցի շուրջ բանակցությունների հերթական փուլը կկայանա մայիսի 14-15-ը: Հանդիպմանը մասնակցելու են երաշխավոր երկրների՝ Ռուսաստանի, Թուրքիայի և Իրանի, ինչպես նաև ՄԱԿ-ի, Սիրիայի և զինված ընդդիմության պատվիրակությունները:
Հիշեցնենք, որ սիրիական պատերազմը սկսվել է 2011թ. մարտին ու դեռևս շարունակվում է: Հայտնի է, որ 7 տարվա ընթացքում զոհվել են հարյուր հազարավոր մարդիկ: Երկրի ներսում հարկադրաբար տեղահանվածների թիվը գերազանցել է 7 մլն-ը, իսկ այլ երկրներում ապաստան ստացածների թիվը՝ 5 մլն-ը: