გაეროს უშიშროების საბჭომ სხდომა მოიწვია ღაზის სექტორში განვითარებული მოვლენების გამო
ისრაელის მთავრობამ პალესტინელთა გასამხედროებული ორგანიზაცია „ჰამასი“ დაადანაშაულა საპროტესტო აქციით შენიღბულ თავდასხმაში. პრემიერ-მინისტრის, ბენიამინ ნეთანიაჰუს განცხადებით, ისრაელის არმიის სამხედროები ქვეყანას იცავდნენ „ჰამასისგან,“ რომელსაც მიზნად აქვს დასახული ისრაელის განადგურება. არმიის სარდლობის მტკიცებით, ცეცხლსასროლი იარაღი გამოყენებული იყო მხოლოდ ექსტრემისტების ჯგუფების წინააღმდეგ, რომლებიც ისრაელის ტერიტორიაზე გადასვლას ცდილობდნენ. ძალადობის პროვოცირებაში „ჰამასი“ დაადანაშაულა აშშ-ის ადმინისტრაციამაც. თავის მხრივ, პალესტინის ავტონომიის მეთაურმა, მაჰმუდ აბასმა ისრაელს ბრალად დასდო მშვიდობიანი დემონსტრანტების მკვლელობა და პალესტინელებს მოუწოდა, 15 მაისს საყოველთაო გაფიცვა გამოაცხადონ.
ღაზის სექტორში განვითარებული მოვლენების გამო, თურქეთმა კონსულტაციებისთვის ელჩები გაიწვია თელ-ავივიდან და ვაშინგტონიდან. თურქეთის პრეზიდენტმა, რეჯეპ ტაიპ ერდოანმა პალესტინელებისადმი ისრაელის მოქმედებას გენოციდი უწოდა.
14 მაისს, იერუსალიმში ოფიციალურად გაიხსნა აშშ-ის საელჩო. პრეზიდენტმა დონალდ ტრამპმა 2017 წლის დეკემბერში გამოაცხადა, რომ საელჩო თელ-ავივიდან იერუსალიმში გადადის. აშშ-ის მიერ ისრაელის დედაქალაქად იერუსალიმის აღიარებას მოჰყვა პალესტინელთა მწვავე პროტესტი, რადგან ისინი აღმოსავლეთ იერუსალიმს მიიჩნევენ მომავალი სახელმწიფოს დედაქალაქად. პრეზიდენტ ტრამპის გადაწყვეტილება გააკრიტიკა არაერთმა სახელმწიფომ, მათ შორის აშშ-ის მოკავშირეებმაც.