Ագարակի պղնձամոլիբդենային կոմբինատի աշխատակիցները գործադուլ են հայտարարել՝ պահանջելով աշխատավարձի բարձրացում
Ագարակի պղնձամոլիբդենային կոմբինատի աշխատակիցները գործադուլ են հայտարարել՝ պահանջելով աշխատավարձի բարձրացում։ Կոմբինատի մոտ հավաքված աշխատակիցները նշում են՝ մինչև աշխատավարձը չբարձրանա, դա թղթի վրա չտեսնեն, չեն աշխատելու:
Կոմբինատի ղեկավարության կողմից ներկայացած մի քաղաքացի՝ գործադուլ անող աշխատակիցներին հավատացրեց՝ որ ղեկավարությունը 2 շաբաթ ժամանակ է խնդրում: «Մեկ օրվա հարց չէ, մեծ փողերի հետ է կապված»,- ասաց նա: Նրան աշխատակիցները չցանկացան լսել, շարունակեցին ներկայացնել իրենց պահանջը, պնդեցին, որ այլ գործարաններում, օրինակ՝ Քաջարանում մեկ օրում աշխատավարձը բարձրացրել են:
Ագարակի պղնձամոլիբդենային կոմբինատի տնօրեն Անդրեյ Սինյակովը ևս փորձեց բանակցել իր աշխատակիցների հետ, հորդորեց արտադրությունը քաղաքականության հետ չխառնել, ժամանակ խնդրեց։ «Եկեք փոքր դադար վերցնեք, դադար՝ աշխատելու համար: Իսկ հունիսի մեկին համատեղ կընդունենք որոշումներ, որոնք անհրաժեշտ են,- ասաց նա՝ հավելելով, որ այսօր կարող է բարձրացնել աշխատավարձը 30 տոկոսով, սակայն հետո ստիպված կլինի փակել կոմբինատը,- ես պարզապես փող չեմ ունենա»:
Աշխատակիցներն ի վերջո համաձայնեցին բանակցել կոմբինատի ղեկավարության հետ: Այս պահին նրանցից մի քանիսը առանձնացել են՝ տնօրինության հետ բանակցելու: