Թուրքիայում եռօրյա ազգային սուգ է հայտարարվել
Պաղեստինի առողջապահության նախարարության հայտարարության համաձայն, ընդհարումների հետևանքով 58 պաղեստինցի է մահացել, շուրջ 2 հազար 700 հոգի՝ վիրավորվել:
Բախումների առիթ է դարձել Իսրայելում Միացյալ Նահանգների դեսպանատան տեղափոխումը Թել Ավիվից Երուսաղեմ:
Պաշտոնական Անկարան խստորեն դատապարտել է Գազայում տեղի ունեցածը՝ մեղադրանքներ հնչեցնելով Իսրայելի և ԱՄՆ-ի հասցեին:
Թուրքիայի նախագահ Ռեջեփ Էրդողանը, Իսրայելն ահաբեկչական պետություն է անվանել՝ երեկվա դեպքերը որակելով իբրև ցեղասպանություն:
Վարչապետ Բինալի Յըլդըրըմն էլ հայտարարել է, որ Թուրքիան չի կարող անտարբեր մնալ բռնությունների նկատմամբ և մուսուլմանական երկրներին կոչ արել վերանայել իրենց հարաբերությունները Իսրայելի հետ:
Միևնույն ժամանակ, Թուրքիայի փոխվարչապետ և կառավարության խոսնակ Բեքիր Բոզդաղը հայտնել է Թել Ավիվում և Վաշինգտոնում Թուրքիայի դեսպաններին խորհրդակցությունների համար Անկարա կանչելու որոշման մասին:
Այսօր Թուրքիայի խորհրդարանում Երուսաղեմի հարցով արտահերթ նիստ է անցկացվում:
Թուրքական իշխանությունները նաև պահանջել են ՄԱԿ-ի և Իսլամական համագործակցության կազմակերպության արտակարգ նիստեր գումարել: