یاماموتو: د فساد پر ضد مبارزې ستراتېژي د افغانستان تعهد څرګندوي

په افغانستان کې د ملګرو ملتونو د ملکي استازي دفتر وايي چې د اداري فساد پر ضد د مبارزې نوې ستراتېژي او د اداري فساد د مخنیوي لپاره د بېلابېلو پلانونو عملي کېدل، له اداري فساد سره مبارزې ته د افغانستان تعهد څرګندوي.


په افغانستان کې د ملګرو ملتونو د عمومي منشي استازي، تدامیچي یاماموتو نن سې شنبه په یوه خبرپاڼه کې ویلي چې ملګري ملتونه په کلکه د افغانستان تر شا چې غواړي له اداري فساد سره مبارزه وکړي، ولاړ دي.


د یوناما راپور "نن د فساد پر ضد مبارزه، له ستراتېژۍ تر عمله" تر سرلیک لاندې خپور شو.


په راپور کې ویل شوي چې په افغانستان کې د عدلي سیستم اصلاحات باید چټک شي او سپارښتنه کوي چې د فساد پر ضد د مبارزې لنډمهاله ستراتېژي محدود اغېز لري، نو له دې امله باید پر اوږدمهالې ستراتېژۍ کار وشي.


تدامیچي یاماموتو وړاندیز کړی چې د افغانستان حکومت دې د نویو اصلاحاتو او قوانینو د جوړولو لپاره کار وکړي.