Իսրայելն անօդաչուներով արցունքաբեր գազ է կիրառել հազարավոր պաղեստինցիների դեմ (լուսանկարներ, տեսանյութ)
Իսրայելի բանակն անօդաչու թռչող սարքերի միջոցով արցունքաբեր գազ է կիրառել Գազայի հատվածի սահմանին հավաքված հազարավոր պաղեստինցի ցուցարարների դեմ, հայտնում է The Daily Mail-ը՝ մանրամասնելով, որ իսրայելա-պաղեստինյան բախումների հետևանքով զոհվել է 59 մարդ, վիրավորվել՝ 2.400-ը:
Աղբյուր գրում է, որ սկզբում իսրայելական կողմը վերևից թռուցիկներ է նետել՝ պաղեստինցիներին նախազգուշացնելով սահմանից հեռու մնալ: Դրանից հետո կիրառվել է արցունքաբեր գազ:
Այնուամենայնիվ, դա հետ չի պահել ցուցարարներին կրկին սահմանի մոտ հավաքվելուց: Ըստ աղբյուրի տվյալների՝ հավաքվել է ավելի քան 35.000 մարդ, որոնց դեմ արցունքաբեր գազից բացի նաև զենք է կիրառվել: Իսրայելցի ուժայինները կրակ են բացել բողոքի ցույցերի առավել ագրեսիվ մասնակիցների ուղղությամբ:
Հայտնի է, որ ցույցերի մասշտաբն ու վրդովմունքի ալիքը զգալիորեն մեծացել է Երուսաղեմում ամերիկյան դեսպանատան բացման ֆոնին:
Պաղեստինցի ցուցարարներն ինքնաշեն պայթուցիկ սարքեր և դյուրավառ հեղուկով շշեր են նետել, անվադողեր այրել և փորձել են կոտրել սահմանային արգելապատնեշները:
Հիշեցնենք, որ երեկ տեղի է ունեցել Երուսաղեմում ԱՄՆ դեսպանատան բացման արարողությունը, որին մասնակցելու նպատակով Իսրայել են ժամանել ԱՄՆ նախագահ Դոնալդ Թրամփի դուստր Իվանկան և նրա ամուսինը՝ Ջարեդ Քուշները, որոնք երկուսն էլ Սպիտակ տան ավագ խորհրդականներ են: