Իսպանիան «անընդունելի» է անվանել Իսրայելի գործողությունները Գազայի հատվածում
Իսպանիայի իշխանությունները քննադատել են Իսրայելի գործողությունները Գազայի հատվածում՝ «անընդունելի» անվանելով դրանք: Այս մասին հայտնում է РИА Новости-ն:
Աղբյուրի հաղորդմամբ՝ Իսպանիայի արտգործնախարար Ալֆոնսո Դաստիսը կոչ է արել «դադարեցնել ուժի կիրառումը, մասնավորապես՝ անհամաչափ ուժի, և վերջ դնել մահերին»:
«Այսպես գործել չի կարելի: Ցուցարարներին դիմակայելու համար երբեմն պետք է ուժ կիրառել, սակայն՝ սահմանափակ: Չի կարելի հրազեն օգտագործել ու սպանել: Սա բացարձակապես անընդունելի է»,- նշել է Դաստիսը:
Հիշեցնենք, որ Գազայի հատվածի և Իսրայելի սահմանին բախումներ են եղել պաղեստինցիների և իսրայելական ուժերի միջև՝ Երուսաղեմում ԱՄՆ դեսպանատան բացմանն ընդառաջ:
Պաղեստինի առողջապահության նախարարությունից հայտնել են, որ Գազայի հատվածում Իսրայելի բանակի ու պաղեստինցիների բախման հետևանքով զոհերի թիվն ավելացել է՝ հասնելով 59-ի:
Երեկ տեղի է ունեցել Երուսաղեմում ԱՄՆ դեսպանատան բացման արարողությունը, որին մասնակցելու նպատակով Իսրայել են ժամանել ԱՄՆ նախագահ Դոնալդ Թրամփի դուստր Իվանկան և նրա ամուսինը՝ Ջարեդ Քուշները, որոնք երկուսն էլ Սպիտակ տան ավագ խորհրդականներ են: