Հարսանյաց զգեստը՝ 400.000$, դիմահարդարումն ու վարսահարդարումը՝ 13.000$. լրագրողները հաշվել են՝ ինչ է արժեցել արքայազն Հարիի և Մեգան Մարքլի հարսանիքը

Մեծ Բրիտանիայի արքայազն Հարիի և ամերիկացի դերասանուհի Մեգան Մարքլի՝ մայիսի 19-ին կայացած հարսանեկան արարողությունն արժեցել է մոտավորապես 43 մլն դոլար:

Ինչպես նշում է BriedBook-ը, նման եզրակացության են եկել լրագրողները՝ հաշվելով մատուցված ծառայությունների ու ծախսերի մոտավոր արժեքը:

Նշվում է, որ գումարի մեծ մասը՝ 40 մլն դոլարը, ծախսվել է միջոցառման անվտանգության վրա:

Աղբյուրի հաշվարկի համաձայն՝ հարսանյաց արարողության կազմակերպիչների ծառայություններն արժեցել են 150.000 դոլար, երաժիշտներին վճարվել է 400.000, ծաղկեգործներին՝ 150.000, լուսանկարիչներին ու օպերատորներին՝ 23.000 դոլար:

Լրագրողները հաշվարկել են, որ հյուրասիրության վրա ծախսվել է 385.000 դոլար: Տորթն արժեցել է 65.000 դոլար:

Givenchy հարսանեկան զգեստի համար վճարվել է 400.000, հրավիրատոմսերի համար՝ 27.000, մատանիների համար՝ 8.000, հարսնացուի վարսահարդարման և դիմահարդարման համար՝ 13.000 դոլար:

Ինչ վերաբերում է մեղրամսին, ապա այն կարժենա 160.000 դոլար: Քաջատեղյակ աղբյուրի փոխանցմամբ՝ մեղրամսի արժեքը վճարելու է Մարքլը՝ որպես նվեր ամուսնուն: