Սփյուռքի ներկայացուցիչներն ընտրություններին մասնակցելո՞ւ, թե՞ տրամադրած ֆինանսները վերահսկելու իրավունք պետք է ունենան. կարծիքներ
Նախագահ Արմեն Սարգսյանն այսօր հայտարարել է, որ գուցե մի օր կհասնենք նրան, որ Սփյուռքի ներկայացուցիչները քվեարկելու իրավունք ունենան: Նա ընդգծել էր, որ պետք է մտածենք մեկ ազգի նման՝ չբաժանելով Հայաստանի, Սփյուռքի, Արցախի բնակիչներին և ճիշտ չէր համարել սփյուռքին միայն որպես դոնոր ընկալելը: Tert.am-ը նախագահի հայտարարությունների վերաբերյալ զրուցել է ՀՌԱԿ ատենապետ Հակոբ Ավետիքյանի և Պահպանողական կուսակցության նախագահ Միքայել Հայրապետյանի հետ:
Հակոբ Ավետիքյանը ողջունում է նախագահի հայտարարությունները` մատնանշելով նաև անվտանգության հետ կապված ռիսկը, իսկ Միքայել Հայրապետյանը նախագահի հայտարարությունը «քարանձավային», «նացիստական» և վաշխառուական մոտեցում է համարում:
ՀՌԱԿ ատենապետ Հակոբ Ավետիքյանը մանրամասնեց , որ տարողունակ հարց է, օրենքների հետ կապված մասնագիտական մոտեցման անհրաժեշտություն կա:
«Այսօր էլ երկքաղաքացին իրավունք ունի քվեարկելու, եթե Հայաստանում գրանցված է, բայց իրավունք չունի ընտրվելու, արդեն այստեղից սկսում է ամբողջ հակասությունը: Ընտրելու իրավունք ունես, բայց ընտրվելու` ոչ , սա պետք է վերանայել: Երկրորդը՝ նման օրենսդրական փորձություններով ի վերջո կկարողանանք ընդգրկել սփյուռքահայերին երկրի կառավարման մեջ: Տարբեր երկրներում տարբեր ձևով են մոտենում, օրինակ՝ Իսրայելում իրավունք ունեն քվեարկելու, բայց Իսրայել հողի վրա, պարտադիր չէ գրանցված լինեն, ունեն երկքաղաքացիություն, գալիս են և իրենց ձայնը տալիս են: Մեր իրականության մեջ արծարծվում են երկքաղաքացիության հարցերը միայն անձնավորված, ավելի ճիշտ՝ թիրախավորված պարագաներում: Ճչացող հակասություններ են երևան գալիս նաև այստեղ, օրինակ՝ զինվորական պարտադիր ծառայության հարցում»,-շեշտեց նա:
Հակոբ Ավետիքյանն ասաց, որ սփյուռքում, եթե կան փորձառու մարդիկ, ապա նրանց փորձը անհրաժեշտ է օգտագործել նաև հայրենիքում:
«Եթե հիշում եք, երբ Վարդան Օսկանյանը պիտի գար մեզ մոտ արտգործնախարար, նա հրաժարվեց ԱՄՆ քաղաքացիությունից, իսկ դա նույնիսկ անհեթեթ է մեր նման ժողովրդի համար, որի երկու-երրորդը ապրում է դրսում»,-ընդգծեց նա:
Հակոբ Ավետիքյանն ընդգծեց, որ ռիսկային է միայն այն, որ եթե երկքաղաքացին խորքային կերպով ինչ ազդեցությունների տակ է գտնվում, անվտանգության խնդիրներ են առաջանում, հետևելը, հետազոտելը դժվարանում է:
Tert.am-ի հետ զրույցում Պահպանողական կուսակցության նախագահ Միքայել Հայրապետյանն էլ ընդգծեց, որ տեղական ինքնակառավարման, տնտեսական, ստեղծագործական, գիտական, հասարակական կառույցներում երազելի պետք է լինի սփյուռքահայերի ընտրական ներգրավվածությունը, քանի որ դա առավել բազմերանգ ու առավել, բազմաձայն և առավել անխոցելի կդարձնի մեր երկրի կյանքը՝ լայն իմաստով, իսկ պետական քաղաքականություն որոշող մարմնում՝ Ազգային ժողովում, Սփյուռքն ինքը պետք է իրեն թույլ չտա, որպեսզի ընտրական մասնակցությամբ ներգրավվի:
«Դա լրջորեն կառնչվի մեր պետական անվտանգությանը: Մենք սփյուռք ունենք աշխարհաքաղաքական տարբեր ուժային կենտրոններում. մի՞թե կարելի է Հայաստանը դարձնել այդ կենտրոնների բախման հանդիպավայր ու նետել քաոսի մեջ: Պետք է Սփյուռքին օրենսդրորեն լիազորել իր նվիրաբերած միջոցների մինչև վերջին ցենտը Հայաստանում թե՛ ինքնուրույնաբար իրացնելու, թե՛ այդ իրացումը վերահսկելու: Բայց երբեք չի կարելի մտածել, թե եթե մեկը թեկուզ հսկայական միջոցներ է բերում Հայաստան, դրանով իրավունք է ստանում տնօրինելու իմ և Ձեր երեխաների անվտանգությունը, կյանքը, ապագան. դա գավառական վաշխառուի հոգեբանություն է: Ավելին՝ դա նացիստական մտածողություն է. ինչո՞վ ենք չափելու որևէ մեկի ազգային պատկանելությունը: Մի՞թե դա վիրավորական, անարդար և խտրական մոտեցում չէ, երբ իմ և Ձեր երեխայի համար զոհված այն եզդի հրաշք պատանի Քյարամ Սլոյանի սիրիացի կամ իրաքցի ազգակիցներն իմ և Ձեր սփյուռքահայ ազգակիցների հետ նույն իրավունքները չեն ունենալու»,-շեշտեց նա:
Միքայել Հայրապետյանը ասաց, որ «քարանձավային» «նացիզմի» և վաշխառուի մոտեցումը պետք է փոխարինել քրիստոնեավարությամբ:
«Ըստ որի՝ իմ ճշմարիտ եղբայրներն իմ լծակիցներն են՝ անկախ ազգային պատկանելությունից. այսինքն՝ քաղաքացի են՝ քաղաքացուն ներկայացվող բոլոր պահանջների կատարմամբ: Պատասխանատվությունն է ծնում իրավունք, ոչ թե ազգակցությունը կամ փողը»,-եզրափակեց նա:
Հիշեցնենք, որ Արմեն Սարգսյանը այս կոնտեքստում հիշատակել էր Իսրայելին, որտեղ հրեան, քաղաքացիություն ստանալով, պարտավոր չէ մի քանի տարի ապրել երկրում՝ առանցքային պաշտոններ զբաղեցնելու իրավունք ստանալու համար.
«Սփյուռքում մեծ սեր կա պատմական հայրենիքի նկատմամբ, և մեր նպատակն է բաց ու ազնիվ կերպով ներգրավել սփյուռքահայերին, ու ոչ թե փող պահանջել և ասել`փող տվեք, գործ չունեք։ Երբեմն, նման սահմանափակումները տարածվում են Սփյուռքի այնպիսի ականավոր ներկայացուցիչների վրա, ինչպիսին Ազնավուրն ու Քըրքորյանը»,-ասել էր նա:
Հիշեցնենք նաև, որ երբ նախկին նախագահ Սերժ Սարգսյանը ժամանակին ներկայացրեց Արմեն Սարգսյանի թեկնածությունը նախագահի պաշտոնում, տևական ժամանակ բարձաձայնվում էր նրա Մեծ Բրիտանիայի քաղաքացիության հետ կապված հարցերը: Սակայն նորընտիր վարչապետ Նիկոլ Փաշինյանը, ով խորհրդարանի ամբիոնից բարձրաձայնել էր հարցը, հետագայում ֆեյսբուքյան էջին գրել էր, որ ապրիլի 26-ին նախագահ Արմեն Սարգսյանը իրեն ցույց է տվել փաստաթղթեր այն մասին, որ Մեծ Բրիտանիայի քաղաքացիությունը կորցրել է 2011 թվականի դեկտեմբերին: Այդ փաստաթուղթը մինչև այս պահը չի հանրայնացնել: