Aq-uquq qorçalayıcıları, Sentsov ve Baluh aqqında G7 toplaşuvında aytacaqlar, dep umüt eteler
Ukraina aq-uquq qorçalayıcıları dünya liderlerini, Rusiyede apis etilip, narazılıq köstererek muddetsiz açlıq ilân etken Ukraina vatandaşları Oleg Sentsov ve Volodımır Baluhnıñ mevzusını açmağa davet eteceklerine umüt eteler.
Bu maqsat içün qullanıla bilecek meydançıqlarından biri, tezden olacaq «Büyük yedilik» toplaşuvıdır. Bunı Qırım.Aqiqat Radiosı efirinde Ukraina aq-uquq qorçalayıcısı, «Sıñırlar olmadan» leyhasınıñ koordinatorı Maksim Butkeviç söyledi.
Butkeviç: «Rusiyede ya da işğal etilgen Qırımnıñ territoriyasında bulunğan Ukrainanıñ siyasiy mabüsleri meselesiniñ çezilmeyip qalğanı aqqında hatırlatma şimdi Almaniya ve Fransa liderlerine iriştirile. Yaqın vaqıtta, iyünniñ başında «Büyük yedilik»niñ toplaşuvı olacaq. Ve tabiiy ki, Kremlniñ ağrılı noqtalarına basmaq kerek. Rusiyede keçecek Futbol boyunca dünya çempionatı da böyle bir ağrılı noqta olacaq», – dep qayd etti.
Mevzuğa dair: «O, soñunace baracaq»: Sentsovnıñ açlığı Kremlniñ ukrain esirlerini azat etmege yardım etecekmi?
Volodımır Baluh: «Sıfır işareti»nde muvazene tutuv
Ukrain faaliyetçisi Volodımır Baluh Aqmescit tahqiqat izolâtorında mart 19-da ilân etken muddetsiz açlıqnı tutmağa devam ete.
Qırımda mahkeme Baluhnı, arbiy yedekler saqlağanında qabaatlı tanıp, 3 yıl ve 5 ayğa koloniya-qasabada azatlıqtan marum etilmesi ve, ondan ğayrı, 10 000 ruble (qararnen 4600 hrivna) miqdarında cöreme tölemesine dair uküm çıqardı. Faaliyetçige qarşı ekinci cinaiy iş Aqşeyh (Razdolnoye) qasabasındaki muvaqqat tutuluv izolâtorınıñ rehberi Valeriy Tkaçenkonıñ arizası esasında açıldı. O, Baluh onı kötekledi, dep iddia ete. Aynı zamanda faaliyetçi ve onıñ imayesi, Tkaçenko özü oña ucüm etkenini bildireler.
Baluhnıñ imayesi ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.
Mayıs 16-da, Rusiyede mahküm etilgen Ukraina rejissörı Oleg Sentsovnıñ, Rusiye apishanelerinde bulunğan bütün Ukraina siyasiy mabüslerni azat etmek talabınen muddetsiz açlıq ilân etkeni belli oldı.
Sentsov ve Qırım sakini Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
Ukraina TİNinde, Rusiye mahkemesi tarafından azatlıqtan marum etilgen Volodımır Baluh ve Oleg Sentsovnıñ ayatları içün telüke bar, dep bildirdiler.